ఖరారు కాని బరాక్ ఒబామా భారత పర్యటన

హైదరాబాద్: అమెరికా అధ్యక్షుడు బరాక్ ఒబామా భారత పర్యటన ఇంకా ఖరారు కాలేదు. ఈ విషయమై ఇరు దేశాల మధ్య చర్చలు జరుగుతున్నాయని హైదరాబాదులోని అమెరికా కాన్సుల్ జనరల్ క్యాథరిన్ థనాని చెప్పారు. ఆమె మంగళవారంనాడు ఆంధ్రప్రదేశ్ ముఖ్యమంత్రి కె. రోశయ్యను కలిశారు. భారత్ లో ఒబామా పర్యటన ఎక్కడెక్కడ ఉంటుందని ఇప్పుడే చెప్పలేమని క్యాథరిన్ మీడియా ప్రతినిధులతో అన్నారు. సాంస్కృతిక, విద్యారంగాల్లో అమెరికా, ఆంధ్రప్రదేశ్ ల మధ్య పరస్పర సహకారం పెంపొందాలని ఆమె అన్నారు.

తమ కార్యాలయం ద్వారా రోజుకు 500 మంది విద్యార్థులను ఇంటర్వ్యూ చేసి ఇందులో 75 శాతం మందికి వీసాలు ఇస్తున్నామని ఆమె చెప్పారు. గచ్చిబౌలిలోని 12 ఎకరాల్లో త్వరలోనే అమెరికా కాన్సులేట్ కు శాశ్వత భవన సముదాయం నిర్మిస్తామని ఆమె చెప్పారు. తన భారత భారత సంతతివారేనని ఆమె చెప్పారు. ఒబామా భారత పర్యటన విజయవంతమవుతుందని ఆమె ఆశాభావం వ్యక్తం చేశారు.