కామన్ వెల్త్ క్రీడల్లో మరో అపశృతి: కూలిన పైకప్పు

న్యూఢిల్లీ: కామన్ వెల్త్ క్రీడల్లో మరో అపశృతి చోటు చేసుకుంది. బుధవారంనాడు నెహ్రూ స్టేడియంలోని వెయిట్ లిఫ్టింగ్ విభాగం పై కప్పు కూలింది. వేదికపై ఎవరూ లేకపోవడంతో ప్రమాదం సంభవించలేదు. మంగళవారంనాడు ఫుట్ ఓవర్ బ్రిడ్జి వంతెన కూలింది. ఈ ప్రమాదంలో 23 మంది గాయపడ్డారు. నెహ్రూ స్టేడియం బయట నిర్మాణంలో ఉన్న ఫుట్ ఓవర్ బ్రిడ్జి కూలింది. కామన్ వెల్త్ క్రీడల ప్రారంభ, ముగింపు కార్యక్రమాలు నెహ్రూ స్టేడియంలోనే జరగాల్సి ఉంది.

తాజాగా రెండో ప్రమాదంతో కామన్ వెల్త్ క్రీడలపై నీలినీడలు అలుముకున్నాయి. క్రీడాగ్రామంలో వసతుల కొరతపై కామన్ వెల్త్ క్రీడల సమాఖ్య చీఫ్ ఫిన్నెల్ ఆందోళన వ్యక్తం చేశారు. కామన్ వెల్త్ క్రీడలకు తాము క్రీడాకారులను పంపడం లేదని న్యూజిలాండ్ ప్రకటించింది. టోర్నీయే రద్దు కావచ్చునని వ్యాఖ్యానించింది. నాసిరకం నిర్మాణాలపై, కుంభకోణాలపై చాలా కాలంగా వివాదాలు చెలరేగుతున్న విషయం తెలిసిందే.