ప్రత్యర్థులపై ఓదార్పు యాత్రలో విరుచుకుపడిన వైయస్ జగన్

ఒంగోలు: కాంగ్రెసు కడప పార్లమెంటు సభ్యుడు వైయస్ జగన్ తన ప్రత్యర్థులపై మరోసారి ధ్వజమెత్తారు. తన ఓదార్పు యాత్ర సందర్భంగా ఆయన బుధవారం ప్రకాశం జిల్లా సంతమగుళూరులో వైయస్ విగ్రహాన్ని ఆవిష్కరించి మాట్లాడారు. రాష్ట్రంలో కొంత మంది కుటిల రాజకీయాలు చేస్తున్నారని, మరణించిన వైయస్ పై బురద చల్లుతున్నారని ఆయన అన్నారు. వైయస్సార్ పై తప్పుడు ఆరోపణలు చేస్తున్నారని, అటువంటి వారు సర్వనాశనమవుతారని ఆయన అన్నారు.

డాక్టర్ వైఎస్సార్ పరిపాలన రాష్ట్రంలో స్వర్ణయుగం అని జగన్ అన్నారు. ప్రతి చెల్లెమ్మ లక్షాధికారి కావాలన్నది వైఎస్సార్ ఆశయం అన్నారు. మాట తప్పని, మడమ తిప్పని మహానేత ఆయన అన్నారు. పేదల కోసం దేశంలో ఏ రాష్ట్రంలో ప్రవేశపెట్టని అద్వితీయమైన పథకాలు ప్రవేశపెట్టి వెస్సార్ ఆదర్శ ముఖ్యమంత్రిగా నిలిచారన్నారు.