డబ్బులు గుంజేందుకే సిఇవోలతో కెసిఆర్ సమావేశం: టిజి వెంకటేష్

హైదరాబాద్: పారిశ్రామికవేత్తల నుంచి డబ్బులు గుంజేందుకే తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు సిఇవోలతో సమావేశమయ్యారని కాంగ్రెసు కర్నూలు శాసనసభ్యుడు టిజి వెంకటేష్ విమర్శించారు. కెసిఆర్ పై ఆయన శుక్రవారం మీడియా ప్రతినిధుల సమావేశంలో తీవ్రంగా మండిపడ్డారు. కెసిఆర్ నిర్విహించిన సిఇవోల సమావేశం వార్నింగ్ సభ అని ఆయన అన్నారు. మేము మిమ్మల్ని చూసుకుంటాం, మమ్మల్ని మీరు చూసుకోవాలని కెసిఆర్ పారిశ్రామికవేత్తలకు చెప్పారని ఆయన అన్నారు.

తెలంగాణ నాయకులు అతిగా ప్రవర్తిస్తున్నారని, టిటిడికి కూడా తెలంగాణ పేరు పెట్టాలని డిమాండ్ చేస్తారని ఆయన అన్నారు. తెలంగాణ నాయకులు అతిగా ప్రవర్తిస్తే సివిల్ వార్ తప్పదని ఆయన అన్నారు. లా సెక్రటరీగా తెలంగాణ అధికారిని నియమించాలనే తెలంగాణ నాయకులను డిమాండ్ ను ఆయన తప్పు పట్టారు. లా సెక్రటరీ పదవి రాయలసీమకు చెందిన ఐఎఎస్ అధికారికి ఇవ్వాలని ఆయన డిమాండ్ చేశారు. రాష్ట్రంలో ఎక్కువగా నష్టపోయింది రాయలసీమనే అని ఆయన అన్నారు. తెలంగాణ నాయకులు దుర్మార్గపు ఆలోచనలు మానుకోకపోతే తీవ్ర పరిణామాలుంటాయని ఆయన అన్నారు.