అత్యుత్సాహంతోనే చిక్కుల్లో పడ్డా: బొత్స సత్యనారాయణ

హైదరాబాద్: వోక్స్ వ్యాగన్ కేసులో తనకు ఊరట లభించడంపై పంచాయతీరాజ్ శాఖ మంత్రి బొత్స సత్యనారాయణ ఆనందం వ్యక్తం చేశారు. మంత్రి అయిన కొత్తలో రాష్టానికి కొత్త పరిశ్రమ తేవాలనే అత్యుత్సాహంతోనే చిక్కుల్లో పడ్డానని ఆయన శనివారం మీడియా ప్రతినిధుల సమావేశంలో అన్నారు. లోటుపాట్లు తన అత్యుత్సాహం వల్లనే జరిగాయని ఆయన అన్నారు. నిజం నిలకడ మీద తెలుస్తుందని మరోసారి రుజువైందని ఆయన అన్నారు. రాష్ట్ర ప్రభుత్వంపై, తనపై వచ్చిన ఆరోపణల్లో నిజం లేదని తేలిపోయిందని ఆయన అన్నారు.

వోక్స్ వ్యాగన్ వ్యవహారం తనకు గుణపాఠం నేర్పిందని ఆయన అన్నారు. ఆ అనుభవం ద్వారా తాను అప్పుడు జాగ్రత్తగా వ్యవహరిస్తున్నట్లు ఆయన తెలిపారు. మీడియా ప్రతినిధులకు ఆయన స్వీట్లు పంచారు. కాగా, వోక్స్ వ్యాగన్ కేసులో సిబిఐ చార్జిషీట్ పై తెలుగుదేశం పార్టీ నాయకుడు కళా వెంకటరావు తీవ్ర అసంతృప్తి వ్యక్తం చేశారు. చార్జీషీట్ లో మంత్రి బొత్స సత్యనారాయణ పేరు లేదంటే కుంభకోణం జరగనట్లేనని ఆయన శనివారం మీడియా ప్రతినిధులతో అన్నారు. సిబిఐ ద్వారా కాంగ్రెసు నాయకులకు శిక్షలు పడవని తేలిపోయిందని ఆయన అన్నారు.