విద్యార్థులపై కేసులు ఎత్తివేయాలి: లగడపాటి రాజగోపాల్

హైదరాబాద్:విద్యార్థులపై ఉన్న కేసులు ఎత్తివేస్తామని ఇటు హోంమంత్రి సబితా రెడ్డి, అటు విజయవాడ ఎంపీ లగడపాటి రాజగోపాల్ వేరు వేరు కార్యక్రమాల్లో విలేకరుల సమావేశంలో చెప్పారు. రాజేంద్రనగర్, శంషాబాద్ లలో పలు అభివృద్ధి పనుల ప్రారంభోత్సవాలకు హాజరైన హోంమంత్రి సబితారెడ్డి విద్యార్థులపై ఉన్న కేసులు ఎత్తివేసేందుకు నిర్ణయం తీసుకుంటామని ఆమె చెప్పారు. ఇప్పుడు సమీక్షా సమావేశాలు నిర్వహిస్తున్నామని, సమావేశాల అనంతరం నిర్ణయం తీసుకుంటామని ఆమె అన్నారు. ఉన్నతాధికారులతో చర్చించిన అనంతరం జిల్లాల వారీగా విద్యార్థులపై కేసులు ఎత్తివేసే ఆలోచనలో ఉన్నట్టు చెప్పారు.

తెలంగాణ, సీమాంధ్ర పేరుతో ఉద్యమాలు చేపట్టి అరెస్టయిన విద్యార్థులపై ఉన్న కేసులను ఎత్తివేయాలంటూ విజయవాడ ఎంపీ లగడపాటి రాజగోపాల్ ప్రభుత్వాన్ని కోరారు. ఆయన ముఖ్యమంత్రి కొణిజేటి రోశయ్యకు ఆయన విద్యార్థులపై కేసులు ఎత్తివేయాలంటూ లేఖ రాశారు. విద్యార్థులు రాజకీయపార్టీలు రెచ్చగొట్టడంతో సహజంగా ఉండే ఆవేశంలో ప్రభుత్వ వ్యతిరేక చర్యలకు పాల్పడ్డారని, రాజకీయ నాయకులు కుమ్ములాటలో వారి భవిష్యత్తు బలి కాకూడదన్నారు. ప్రభత్వం త్వరలోనే కేసులు ఎత్తివేసేందుకు చర్యలు తీసుకుంటుందని ఆయన అన్నారు.