పట్టుమని పదినెలలు పార్టీని నడపలేక పోయాడు: హరీష్ రావు

హైదరాబాద్: తెలుగుదేశం నేతలపై తెరాస సిద్దిపేట ఎమ్మెల్యే మరోసారి ధ్వజమెత్తారు. దేవేందర్ గౌడ్ తెలుగు దేశం తెలంగాణకు వ్యతిరేకమని చెప్పి బయటకు వచ్చి నవ తెలంగాణ పార్టీని స్థాపించి పట్టుమని పదినెలలు కూడా పార్టీని నడిపించలేక పోయారని, ఆ తర్వాత ఆంధ్రా నాయకత్వంలోని ప్రజారాజ్యంలో చేరి అక్కడా తన ప్రాబల్యం చూసుకున్నప్పటికీ అక్కడ కూడా ఆయన ఎదగలేక తిరిగి మళ్లీ తెలంగాణకు వ్యతిరేకమన్న తెలుగు దేశంలోకి మళ్లీ రావటం వెనుక ఆయనకు రాజకీయ ఉద్దేశ్యమే కాని తెలంగాణపట్ల చిత్తశుద్ధి ఏ మాత్రం లేదని హరీష్ రావు విలేకరుల సమావేశంలో దుయ్యబట్టారు.

మహానాడులో తెలంగాణపై కనీసం తీర్మానం పెట్టని పార్టీలో ఉండి వారు ఏం సాధిస్తారన్నారు. మహానాడులో కనీసం తెలంగాణకోసం మరణించిన విద్యార్థులపై తీర్నాణం కూడా చేయలేదని విమర్శించారు. దేవేందర్ గౌడ్ ను వికారాబాద్ లో అడ్డుకొని సమావేశానికి కూడా వెళ్లనివ్వలేదని, కనీసం విద్యార్థులు అడిగిన ప్రశ్నలకు ఆయన సమాధానం కూడా చెప్పలేక పోయాడన్నారు. ఆంధ్రులకు పలుమార్లు ఆమ్ముడు పోవటం తెలంగాణ తెలుగు దేశం నాయకులు తెలంగాణను బజారు కీడుస్తున్నారన్నారు.

చంద్రబాబు అనవసరంగా టీఆర్ఎస్ పై ఎదురుదాడికి దిగడం మానుకొని శ్రీకృష్ణ కమిటీకి నివేదిక ఇవ్వాలన్నారు.చంద్రబాబు సీమాంధ్ర, తెలంగాణ తనకు రెండు కళ్లు ఆంటూ ప్రజలను మభ్యపెడుతున్నాడని, తెలంగాణపై మొసని కన్నీరు కార్చుతూ సానుభుతి తెలంగాణలో క్రమంగా కోల్పోతున్న క్యాడర్ ను నిలబెట్టుకోవాలని చూస్తున్నాడన్నారు. కేవలం ఉనికిని కాపాడుకునేందుకే విమర్షలు చేస్తున్నారన్నారు. తెలంగాణలో తెలుగు దేశానికి స్వార్థంతో ఉన్న నాయకులు తప్పితే కార్యకర్తలు మిగలరని అన్నారు. తెలంగాణకు చెందిన తెలుగుదేశం నాయకులు ఊకదంపుడు ఉపన్యాసాలు మానుకొని చంద్రబాబును వ్యతిరేకించి బయటకు వచ్చి తెలంగాణకోసం స్వచ్ఛందంగా పోరాడుతామంటే తాము తప్పుకొని, మీ వెనుక నడవటానికి సిద్ధంగా ఉన్నామన్నారు. కావాలంటే తెలంగాణ కోసం మరోసారి రాజీనామాకు సిద్దమని ప్రకటించారు. పదవులను తృణపాయంగా పలుమార్లు వదులుకున్న తమకు తెలంగాణే ముఖ్యమనే విషయాన్ని ప్రజలు గ్రహించారని, కాని తెలంగాణలోని తెలుగుదేశం పార్టీ నేతలు మాత్రం గ్రహించలేక పోయారన్నారు.