వైయస్సార్ రైతులను దోచి దళారులకు పెట్టారు: చంద్రబాబు

అనంతపురం: దివంగత ముఖ్యమంత్రి వైయస్ రాజశేఖర రెడ్డి రైతుల భూములను దోచి దళారులకు కట్టబెట్టారని తెలుగుదేశం పార్టీ అధ్యక్షుడు నారా చంద్రబాబు నాయుడు విమర్శించారు. లేపాక్షి నాలెడ్జి సిటీ కోసం రైతుల భూములను తక్కువ ధరకు సేకరించి, లక్షలాది రూపాయలు రియల్ ఎస్టేట్ వ్యాపారులకు కట్టబెట్టారని ఆయన ఆరోపించారు. అనంతపురంలో జిల్లా కలెక్టర్ కార్యాలయం ముందు సోమవారం తెలుగుదేశం పార్టీ నిర్వహించిన ధర్నాలో ఆయన ప్రసంగించారు. సెజ్ ల పేరుతో రైతుల భూములను అతి తక్కువ ధరలకు సేకరించి రియల్ ఎస్టేట్ వ్యాపారులకు కట్టబెట్టారని ఆయన ఆరోపించారు. వైయస్ హయాంలో 7వేల మంది రైతులు ఆత్మహత్య చేసుకున్నారని ఆయన అన్నారు.

ఎరువుల అక్రమ రవాణాలో కడప మేయర్ రవీంద్రనాథ్ రెడ్డిపై పెట్టిన 420 కేసును ఉపసంహరించుకోవడంపై చంద్రబాబు ముఖ్యమంత్రి కె. రోశయ్య మీద తీవ్ర వ్యాఖ్యలు చేశారు. రవీంద్రనాథ్ రెడ్డిని అరెస్టు చేయాలని ఆయన డిమాండ్ చేశారు. వైయస్ బావ మరిది కాబట్టి రవీంద్రనాథ్ రెడ్డిపై కేసును ఉపసంహరించారా అని ఆయన అడిగారు. వైయస్సార్ పేరు వింటేనే రోశయ్య భయపడుతున్నారని ఆయన వ్యాఖ్యానించారు. వ్యవసాయ శాఖ మంత్రి రఘువీరా రెడ్డి తీరుపై ఆయన తీవ్ర ఆగ్రహం వ్యక్తం చేశారు. రైతులు కార్పొరేట్ ఆస్పత్రుల్లో చికిత్స చేయించుకుంటున్నారని, ఘనంగా పిల్లల పెళ్లిళ్లు చేస్తున్నారని రఘువీరా రెడ్డి అంటున్నారని, మంగళసూత్రాలు కూడా అమ్ముకుని పెళ్లిళ్లు చేస్తున్నారని ఆయన అన్నారు. రైతులు బంగారు పల్లెంలో తినడం లేదని ఆయన అన్నారు. లేపాక్షి నాలెడ్జి సిటీ భూములను తిరిగి రైతులకు అప్పగించాలని ఆయన డిమాండ్ చేశారు.