రాజకీయాల్లో జగన్ పసిగుడ్డు: ఎర్రంనాయుడు

హైదరాబాద్: రాజకీయాల్లో దివంగత ముఖ్యమంత్రి వైయస్ రాజశేఖర్ రెడ్డి కొడుకు జగన్మోహన్ రెడ్డి పసిగుడ్డు అని తెలుగు దేశం పార్టీ సీనియర్ నాయకులు, ఎంపీ కింజారపు ఎర్రంనాయుడు అన్నారు. ప్రతి పార్టీకీ కార్యకర్తలు ఉంటారని, తమ పార్టీకి ఉన్నారని, సమావేశాలకు ప్రజలు వచ్చినంత మాత్రాన జగన్ ను చూసి తాము భయపడుతున్నామనడం హాస్యాస్పదమన్నారు. జగన్ ఇప్పుడిప్పుడే రాజకీయాల్లో ఎదుగుతున్నాడు. ఆలాంటి వారి గురించి భయపడాల్సిన ఆవసరం లేదు. వైయస్ రాజశేఖర్ రెడ్డి అధికారంలో ఉన్నప్పుడు భారీ అక్రమాలకు పాల్పడ్డాడని, అలాంటి వ్యక్తి అవినీతిపై ప్రశ్నిస్తే తప్పేమిటని ప్రశ్నించారు.

ఇక కాంగ్రెస్ ప్రభుత్వం పాలన అంతా ఆస్తవ్యస్తంగా ఉందని ప్రజలు గెలిపించినందుకు బాధపడుతున్నారన్నారు. రాష్ట్రంలోని శాంతిభద్రతలకు చలసాని పండు హత్యనే అద్దం పడుతుందన్నారు. అప్పుడు రాజశేఖర్ రెడ్డి, ఇప్పుడు రోశయ్య హయాంలో రాష్ట్రంలో శాంతిభద్రత కొరవడిందన్నారు. అధికారం చేతిలో ఉందని వ్యోక్స్ వ్యాగన్ అక్రమాలనుండి మంత్రి బొత్స సత్యనారాయణ తప్పించుకున్నాడని, కాని దానికి ఆయనే బాధ్యత వహించాలని డిమాండ్ చేశారు.