పార్టీకి బావ మరిది అల్లు అరవింద్, సినిమాలకు బావ చిరంజీవి

హైదరాబాద్: ప్రజారాజ్యం పార్టీలో కీలక పాత్ర పోషించేందుకు ప్రధాన కార్యదర్శిగా అల్లు అరవింద్ ముందుకు రావడంపై పలు ఊహాగానాలు, వ్యాఖ్యానాలు ముందుకు వస్తున్నాయి. ఇంత కాలం సినిమాల్లో బిజీగా ఉండి పార్టీ కార్యకలాపాలకు దూరంగా అల్లు అరవింద్ మళ్లీ పార్టీలో క్రియాశీలక పాత్ర పోషించడానికి ముందుకు రావడం వెనక పార్టీ అధ్యక్షుడు చిరంజీవి వ్యక్తిగత కారణం ఉన్నట్లు తెలుస్తోంది. ఇంత కాలం పార్టీ అధ్యక్షుడిగా చిరంజీవి వివిధ జిల్లాల్లో పర్యటిస్తూ పార్టీ కార్యకలాపాలను నడుపుతూ వచ్చారు. ఇప్పుడు ఆయన తన 150 చిత్ర నిర్మాణంలో బిజీ కానున్నారు. ఈ స్థితిలో పార్టీని నడిపించడానికి నమ్మకమైన వ్యక్తి కావాల్సి వచ్చింది. బావ మరిది కన్నా నమ్మకమైన వ్యక్తి ఆయనకు పార్టీలో కనిపించలేదు. దీంతో ఆయన బావ మరిదికి పార్టీలో తన పాత్రను అప్పగించినట్లు భావిస్తున్నారు.

చిత్ర నిర్మాణం పూర్తి కావడానికి చిరంజీవికి కనీసం ఏడాది పడుతుంది. ఈ ఏడాది పాటు పార్టీ కార్యకలాపాలను చూసుకుంటూ చిత్రంలో నటించడం కష్టంగానే ఉంటుంది. రెండు గుర్రాలపై స్వారీ అంత సులభం కాదు. అందుకే ఆయన తన బావమరిదికి పార్టీ నాయకత్వాన్ని అప్పగించినట్లు చెప్పవచ్చు. అమెరికా పర్యటనలో ఉన్న చిరంజీవి పార్టీ కార్యాలయానికి ఫోన్ చేసి అల్లు అరవింద్ ను పార్టీ ప్రధాన కార్యదర్శిగా నియమిస్తున్నట్లు చెప్పారు. తన గైర్హాజరీలో పార్టీని నాయకులు ఎటు వైపు తీసుకుని పోతారో అనే భయంతో అల్లు అరవింద్ కు పార్టీ పగ్గాలు అప్పగించినట్లు చెబుతున్నారు.