వైయస్ జగన్ పై చర్య తీసుకునే దమ్ము సోనియాకు లేదా?

హైదరాబాద్: కడప పార్లమెంటు సభ్యుడు వైయస్ జగన్ పై చర్య తీసుకునే దమ్ము సోనియాకు లేదని తెలుగుదేశం పార్టీ సీనియర్ నాయకుడు తలసాని శ్రీనివాస యాదవ్ అన్నారు. వైయస్ జగన్ విషయంలో డ్రామా ఆడుతున్నారని, పార్టీని నియంత్రించే స్థితిలో కూడా సోనియా లేరని ఆయన గురువారం మీడియా ప్రతినిధుల సమావేశంలో అన్నారు. తెలంగాణకు అనుకూలంగా తమ పార్టీ అధ్యక్షుడు నారా చంద్రబాబునాయుడితో శ్రీకృష్ణ కమిటీకి లేఖ ఇప్పించాలనే కాంగ్రెసు తెలంగాణ పార్లమెంటు సభ్యుల డిమాండ్ పై ప్రతిస్పందిస్తూ ఆయన ఆ విధంగా అన్నారు. కాంగ్రెసు నాయకులే ఒక్క మాట లేరని ఆయన అన్నారు. తెలంగాణ కాంగ్రెసు నాయకులు వారి పార్టీకి చెందిన సీమాంధ్ర నాయకులతో తెలంగాణకు అనుకూలంగా శ్రీకృష్ణ కమిటీకి లేఖ ఇప్పించగలరా అని ఆయన అడిగారు.

ప్రదేశ్ కాంగ్రెసు కమిటీ (పిసిసి) అధ్యక్షుడు సమావేశం నిర్వహిస్తే సీమాంధ్ర నాయకులు రాలేదని, డిఎస్ తెలంగాణ నాయకుడు కాబట్టే వారు అలా వ్యవహరించారని ఆయన అన్నారు. తమ నేత చంద్రబాబుపై తీవ్ర వ్యాఖ్యలు చేస్తున్న తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావుపై ఆయన తీవ్రంగా ధ్వజమెత్తారు. టిడిపి ఆంధ్రా పార్టీ అని వ్యాఖ్యానిస్తున్న కెసిఆర్ తమతో ఎందుకు పొత్తు పెట్టుకున్నారని ఆయన అడిగారు. తెలుగుదేశం పార్టీలోనే కెసిఆర్ ఎదిగారని ఆయన అన్నారు.