ఇమ్రాన్ ఖాన్ చేతిలో గాయపడిన నటి కత్రినా కైఫ్

చండీఘడ్: హర్యానాలోని పటౌడి ప్యాలెస్ లో షూటింగ్ సందర్భంగా బాలీవుడ్ నటి కత్రినా కైఫ్ గాయపడ్డారు. ఇమ్రాన్ ఖాన్ తో యాష్ రాజ్ ఫిల్మ్స్ సినిమా షూటింగ్ సందర్భంగా ఆమె ముక్కుకు గాయమైంది. సహ నటుడు ఇమ్రాన్ ఖాన్ తప్పుడు అవగాహన వల్ల కత్రినా గాయపడ్డారు. రణబీర్ కపూర్ తో అజబ్ ప్రేమ్ కీ గజబ్ కహానీ సినిమా షూటింగ్ సందర్బంగా కూడా కత్రినాకు ఇదే స్థానంలో గాయమైంది. మంగళవారంనాడు ఈ సంఘటన జరిగినప్పటికీ ఆలస్యంగా వెలుగులోకి వచ్చింది.

ఓ హాస్యభరితమైన సన్నివేశాన్ని చిత్రీకరిస్తుండగా కత్రినాకు ప్రమాదం జరిగింది. ఇమ్రాన్ చేతిలో ఉన్న గన్ బ్యారెల్ తగలడంతో కత్రినాకు గాయమైంది. గాయంతో రక్తం కారింది. దాంతో వైద్యులను పిలిపించారు. షూటింగ్ ఆపేశారు. తాను గాయపడిన మాట వాస్తవమేనని కత్రినా అంగీకరించారు. ఇది చిత్రానికి మంచిని చేస్తోందని సిబ్బంది అభిప్రాయపడుతున్నారట.