తెలంగాణ ఇస్తే రాజకీయాలకు లగడపాటి గుడ్ బై

హైదరాబాద్: తెలంగాణ రాష్ట్రాన్ని ఏర్పాటు చేస్తే తాను రాజకీయాల నుంచి తప్పుకుంటానని కాంగ్రెసు పార్లమెంటు సభ్యుడు లగడపాటి రాజగోపాల్ చెప్పారు. సాక్షి టీవీ చానెల్ నిర్వహించిన ఓ కార్యక్రమంలో ఆయన విషయం చెప్పారు. ఈ కార్యక్రమంలో తెలంగాణ రాష్ట్ర సమితి (తెరాస) శాసనసభ్యుడు కెటి రామారావు కూడా పాల్గొన్నారు. కాంగ్రెసు సీమాంధ్ర పార్లమెంటు సభ్యుడు సబ్బం హరి కెటి రామారావుతో మాట్లాడారు. కెటి రామారావు వేసిన ప్రశ్నలకు లగడపాటి రాజగోపాల్ జవాబులిచ్చారు. ల్యాంక్ హిల్స్ కు ప్రభుత్వం ఇచ్చిన భూమిపై కెటి రామారావు లగడపాటి రాజగోపాల్ పై తీవ్ర వ్యాఖ్యలు చేశారు.

ల్యాంక్ హిల్స్ కు భూముల కేటాయింపుపై కెటి రామారావు ఆరోపణలకు లగడపాటి సమాధానం ఇవ్వడానికి ప్రయత్నించారు. తమ వ్యాపారాల కోసమే సీమాంధ్ర నాయకులు తెలంగాణ రాష్ట్ర ఏర్పాటును వ్యతిరేకిస్తున్నారని కెటి రామారావు తప్పు పట్టారు. తెలంగాణ రాష్ట్రం ఏర్పడితే సీమాంధ్ర రాజకీయ నాయకుల అవినీతి, అక్రమాలు బయటకు వస్తాయని ఆయన అన్నారు. ఇరువురి మధ్య తీవ్ర వాగ్వివాదం చెలరేగింది.