కవిత వర్సెస్ గీతారెడ్డి: తెలంగాణలో ప్రభుత్వ బతుకమ్మ పండుగ

హైదరాబాద్: తెలంగాణ వ్యాప్తంగా బతుకమ్మ ఉత్సవాలు ఘనంగా జరుపుతామని తెలంగాణ జాగృతి అధ్యక్షురాలు కవిత ప్రకటించిన విషయం తెలిసిందే. ఇప్పుడు అదే దారిలో పర్యాటక శాఖా మంత్రి గీతారెడ్డి నడుస్తున్నట్టున్నారు. ప్రభుత్వం ఆధ్వర్యంలో తెలంగాణలోని పది జిల్లాల్లో ఘనంగా బతుకమ్మ ఉత్సవాలు నిర్వహిస్తామని ఆమె విలేకరుల సమావేశంలో తెలిపారు. 9 కోట్ల రూపాయలతో తెలంగాణలోని ప్రతిష్టాత్మక రామప్ప దేవాలయంతో పాటు, రామప్ప చెరువును తెలంగాణలోని మిగతా చెరువులను అభివృద్ధి పరుస్తామని ఆమె పేర్కొన్నారు. అంతేకాకుండా 2013వ సంవత్సరంలో రామప్ప దేవాలయం 800 ఏళ్ల ఉత్సవాలను ఘనంగా నిర్వహించాలని ప్రభుత్వం నిర్ణయం తీసుకుందని తెలిపారు.

తెలంగాణ వ్యాప్తంగా తెలంగాణ జాగృతి అధ్యక్షురాలు కవిత బతుకమ్మ ఉత్సవాలను నిర్వహిస్తామని ప్రకటించటం, తెలంగాణ కోసం, తెలంగాణ పండుగల కోసం, తెలంగాణకు సంబంధించిన ఏ విషయంలోనైనా కవిత ముందుండటంతో మహిళలు ఆమెవైపు మొగ్గకుండా ప్రభుత్వం ఈ నిర్ణయం తీసుకుంటున్నట్లు పలువురు భావిస్తున్నారు. ఈ చర్యల వల్ల తెలంగాణను కాంగ్రెస్ విస్మరించటం లేదనే సందేశాన్ని మహిళల్లోకి పంపించడంతో పాటు కవితకు చెక్కు పెట్టడానికి కూడా ఉపయోగపడుతుందని భావిస్తున్నారు.