తెలంగాణపై సోనియా గాంధీతో చంద్రబాబుకు పోటీ పెట్టిన నాగం

హైదరాబాద్: తెలంగాణ ఇస్తామని కాంగ్రెసు అధ్యక్షురాలు సోనియా గాంధీతో చెప్పిస్తే తెలంగాణకు అనుకూలంగా తమ పార్టీ అధ్యక్షుడు చంద్రబాబునాయుడితో శ్రీకృష్ణ కమిటీకి లేఖ ఇప్పిస్తామని తెలుగుదేశం పార్టీ తెలంగాణ ఫోరం కన్వీనర్ నాగం జనార్ధన్ రెడ్డి తెలంగాణ రాష్ట్ర సమితి అధ్యక్షుడు కెసిఆర్ కు తెలిపారు. పార్టీలకతీతంగా తెలంగాణలోని అన్ని పార్టీలను కలుపుకొని పోయి పోరాడాల్సితన తెరాస అధినేత చంద్రశేఖర రావు దానిని విస్మస్తున్నాడని విమర్శించారు. తెలంగాణ తెచ్చేది మేమే..ఇచ్చేది మేమే అని ఎప్పుడూ పత్రికల కెక్కుతున్న కాంగ్రెస్ ను వదిలి కేవలం తెలుగు దేశాన్ని టార్గెట్ చేసి మాట్లాడుతున్నాడని ఆరోపించారు.

సోనియా గాంధీ ముఖ్యమంత్రి రోశయ్యకు ఆదేశాలు ఇచ్చి ఉంటే అసెంబ్లీలో తెంలగాణకు అనుకూలంగా తీర్మానం ప్రవేశపెట్టే వారని, అప్పుడు తీర్మానం కూడా అయ్యేదని అని వ్యాఖ్యానించారు. బిల్లు ప్రవేశపెట్టడానికి వెనక్కి పోతున్న కాంగ్రెస్ ను ఆయన నిలదీయాలని సూచించారు. కాని కెసిఆర్ కాంగ్రెస్ తో కుమ్మక్కు అయ్యి టిడిపిని విమర్శిస్తున్నాడని అన్నాడు. ఏదో ఒక విధంగా పార్టీని కాపాడుకోవడానికి ఆయన తెలుగు దేశంపై విమర్శలు చేస్తున్నాడని, కాని ప్రజలు ఆయన కాంగ్రెస్ తో కలిసి చేస్తున్న నాటకాలను గమనిస్తున్నారని చెప్పారు.