ఐరోపాలో ముంబై తరహా దాడులకు ఒసామా బిన్ లాడెన్ కుట్ర

వాషింగ్టన్: ఐరోపా నగరాలపై దాడులకు ఆల్ ఖైదా చీఫ్ ఒసామా బిన్ లాడెన్ కుట్ర పన్నిన విషయం వెలుగులోకి వచ్చింది. మరోసారి అమెరికాపై కూడా దాడి చేసేందుకు కూడా కుట్ర పన్నినట్లు తెలిసింది. ఓ రేడియా ఈ విషయాన్ని బయటపెట్టింది. మూడు ఐరోపా దేశాల్లో ముంబై తరహా దాడులు చేయాలని లాడెన్ ఆల్ ఖైదా అనుబంధ సంస్థలకు, భాగస్వామ్య సంస్థలకు ఆదేశాలు పంపినట్లు నేషనల్ పబ్లిక్ రేడియో తెలిపింది. ఇంగ్లాండు, జర్మనీ, ఫ్రాన్స్ ల్లోని ప్రధాన నగరాలపై దాడులు చేయాలని అతను ఆదేశాలు పంపినట్లు సమాచారం.

ఐరోపా దేశాల్లో రద్దీగా ఉండే ప్రాంతాల్లో, పర్యాటకులు ఎక్కువగా ఉండే స్థలాల్లో ముంబై తరహాలో కాల్పులు జరపాలని అతను ఆదేశించినట్లు రేడియో తెలిపింది. ఇందులో భాగంగా హోటళ్లను స్వాధీనంలోకి తీసుకోవాలని లాడెన్ సూచించాడు. అయితే, ఆ కుట్రకు సంబంధించిన పూర్తి వివరాలను రేడియో ప్రసారం చేయలేదు. లాడెన్ కుట్ర గురించి తమకు తెలుసునని ఓ నిఘా విభాగం అధికారి చెప్పారు.