రాహుల్ గాంధీ ఆహ్వానంతో కాంగ్రెసులోకి తమిళ హీరో అజిత్?

చెన్నై: తమిళ హీరో అజిత్ ను కాంగ్రెసు పార్టీలో చేర్చుకునేందుకు ప్రయత్నాలు సాగుతున్నట్లు సమాచారం. పార్టీలో చేరాల్సిందిగా ఎఐసిసి ప్రధాన కార్యదర్శి రాహుల్ గాంధీ అజిత్ ను ఆహ్వనించినట్లు సమాచారం. అజిత్ తో చర్చలు జరిపేందుకు ఆయన తన దూతలను చెన్నై పంపినట్లు తెలుస్తోంది. అజిత్ తెలుగు ప్రేక్షకులకు కూడా పరిచితుడే. ఆయన ప్రముఖ హీరో నాగార్జునతో కలిసి ఓ చిత్రంలో నటిస్తున్నారు. పార్టీలో ఉన్నత స్థానం కల్పిస్తామని రాహుల్ అజిత్ కు హామీ ఇచ్చినట్లు చెబుతున్నారు.

కాగా, అజిత్ ను తమ పార్టీలో చేర్చుకునేందుకు అన్నాడియంకె నేతలు కూడా తీవ్ర ప్రయత్నాలు చేస్తున్నట్లు ప్రచారం జరుగుతోంది. అయితే, అజిత్ ఇప్పటి వరకు ఏ విధమైన నిర్ణయం తీసుకోలేదని తెలుస్తోంది. కాంగ్రెసులో చేరడమా, అన్నాడియంకెలో చేరడమా అనే సందిగ్ధంలో ఆయన ఉన్నట్లు చెబుతున్నారు. తమిళనాడులో పార్టీని పటిష్టం చేయాలని భావిస్తున్న రాహుల్ అజిత్ రాక ఎంతో ఉపయోగపడుతుందని భావిస్తున్నారు. తమిళనాడు శాసనసభ ఎన్నికలు సమీపిస్తున్న తరుణంలో అజిత్ కు ప్రచాస సారథ్య బాధ్యతలు అప్పగించాలనే ఆలోచనలో రాహుల్ ఉన్నట్లు చెబుతున్నారు.