రవీంద్రారెడ్డిని సవాల్ చేసిన వైయస్ జగన్ మామ రవీంద్రనాథ్ రెడ్డి

కడప: తనపై ఆరోపణలు చేస్తున్న మైదుకూరు కాంగ్రెసు శాసనసభ్యుడు డిఎల్ రవీంద్రా రెడ్డికి కడప మాజీ మేయర్, కడప పార్లమెంటు సభ్యుడు వైయస్ జగన్ మేనమామ రవీంద్రనాథ్ రెడ్డి సవాల్ విసిరారు. దుమ్ముంటే డిఎల్ రవీంద్రారెడ్డి మైదుకూరు నియోజకవర్గం నుంచి శాసనసభ సభ్యత్వానికి రాజీనామా చేసి తిరిగి పోటీ చేసి గెలవాలని ఆయన సవాల్ చేశారు. తనపై కార్పొరేటర్ గానైనా గెలవగలరా అని ఆయన ప్రశ్నించారు. డిఎల్ రవీంద్రారెడ్డి అబద్ధాలు దయ్యాలు వేదాలు వల్లించినట్లుగా ఉన్నాయని ఆయన శుక్రవారం మీడియా ప్రతినిధుల సమావేశంలో వ్యాఖ్యానించారు.

డిఎల్ రవీంద్రారెడ్డిది అవినీతి చరిత్ర అని ఆయన అన్నారు. బినామీ పేర్లతో నాసిరకం విత్తనాలు సరఫరా చేసి రవీంద్రా రెడ్డి కోట్లు దండుకున్నారని, షూ కంపెనీ పేరుతో రైతులకు నాసిరకం విత్తనాలు సరఫరా చేసి 15 ఏళ్లుగా అవినీతికి పాల్పడుతున్నారని ఆయన ఆరోపించారు. తెలుగుగంగ పనుల్లో రవీంద్రారెడ్డి 65 కోట్ల రూపాయలు దండుకున్నారని ఆయన అన్నారు. నేను అవినీతికి పాల్పడ్డానో, నువ్వు అవినీతికి పాల్పడ్డావో తేల్చడానికి విచారణకు సిద్ధమేనా అని ఆయన రవీంద్రా రెడ్డిని ప్రశ్నించారు.