అయోధ్య తీర్పులాగే తెలంగాణపై శ్రీకృష్ణ కమిటీ నివేదిక: టిజి వెంకటేష్

కర్నూలు: తెలంగాణ సమస్య పరిష్కారానికి శ్రీకృష్ణ కమిటీ నివేదిక ఎలా ఉంటుందో కాంగ్రెసు కర్నూలు శాసనసభ్యుడు, రాయలసీమ హక్కుల వేదిక కన్వీనర్ టిజి వెంకటేష్ జోస్యం చెప్పారు. అయోధ్య తీర్పు మాదిరిగానే శ్రీకృష్ణ కమిటీ నివేదిక ఉంటుందని ఆయన శుక్రవారం మీడియా ప్రతినిధులతో చెప్పారు. హైదరాబాదులో రాజధాని, రాయలసీమలో రెండవ రాజధాని, కోస్తాలో హైకోర్టు బెంచ్ ఏర్పాటు చేయాలని శ్రీకృష్ణ కమిటీ సిఫార్సు చేసే అవకాశం ఉందని ఆయన చెప్పారు. ఆ ఫార్ములాకు అందరూ అంగీకరిస్తారని ఆయన చెప్పారు.

తెలంగాణ ఇస్తామని తమ పార్టీ అధ్యక్షురాలు సోనియా గాంధీ చెప్తే అందరూ అంగీకరిస్తారని, అయితే సోనియా అటువంటి తప్పు చేయరని ఆయన అన్నారు. సోనియా గాంధీ గొప్ప నాయకురాలని, ఆమె తప్పులు చేయరని టిజి వెంకటేష్ న్నారు. తెలంగాణ ఇస్తామని సోనియా ఎప్పుడు చెప్పారో బయట పెట్టాలని ఆయన తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావును అడిగారు. ప్రాంతీయ ఉద్యమాల సందర్భంగా విద్యార్థులపై కేసులు ఎత్తేయడాన్ని తాను సమర్థిస్తానని, అయితే వారి వెనక ఉన్న కుట్రదారులపై కేసులు నమోదు చేయాలని ఆయన అన్నారు.

తెలంగాణపై తమ పార్టీ అధ్యక్షురాలు సోనియా ఇంటి ముందు ధర్నా చేస్తామని ప్రకటించిన తెలుగుదేశం తెలంగాణ నాయకులపై ఆయన తీవ్రంగా ధ్వజమెత్తారు. బాబ్లీపై ధర్నాకు వెళ్లి తెలుగుదేశం నాయకులు కాళ్లూ చేతులు విరగ్గొట్టుకున్నారని, సోనియా ఇంటి ముందు ధర్నా చేస్తే తెలుగుదేశం నాయకుల నడుములు విరుగుతాయని ఆయన అన్నారు.