జాతీయ జెండా తిరగబడిన కేసులో అల్లు అరవింద్ కు ఊరట

హైదరాబాద్‌: జాతీయ పతాకాన్ని అవమానించారంటూ గతనెల 12వ తేదీన ప్రజారాజ్యం పార్టీనేత అల్లుఅరవింద్‌పై జూబ్లీహిల్స్‌ పోలీసు స్టేషన్‌లో నమోదైన కేసువిచారణ ప్రక్రియను నిలిపివేస్తూ శుక్రవారం హైకోర్టు మధ్యంతర ఉత్తర్వులు జారీ చేసింది. మురళీధర్‌ దేశ్‌పాండే ఫిర్యాదు మేరకు పోలీసులు నమోదు చేసిన కేసును కొట్టివేయాలంటూ దాఖలైన పిటిషన్‌పై శుక్రవారం జస్టిస్‌ రెడ్డి కాంతారావు విచారణ చేపట్టారు. ఈ కేసు విచారణ ప్రక్రియపై స్టే మంజూరు చేశారు.

చిరంజీవి బ్లడ్‌ బ్యాంకులో ఆగస్టు 15వ తేదీ జెండా తిరగబడిందనీ, ఇది ఉద్దేశపూర్వకంగా చేసింది కాదని పిటిషనర్‌ తరఫు సీనియర్‌న్యాయవాది పి.గంగయ్యనాయుడు తెలిపారు. జాతీయ పతాకం ఏర్పాటు చేసే సమయంలో తాడు తెగిపోయిందనీ, దాన్ని అమర్చే సమయంలో జరిగిన హడావుడిలో సిబ్బంది తిప్పి కట్టారని వివరించారు. అనంతరం గమనించి సరిదిద్దుకుని బహిరంగ క్షమాపణ తెలిపినట్లు చెప్పారు.