తెలంగాణపై చంద్రబాబు ఇంటి వద్ద ఒయు విద్యార్థుల గాంధీగిరి

హైదరాబాద్‌: తెలుగుదేశం పార్టీ అధ్యక్షుడు నారా చంద్రబాబు నాయుడి ఇంటి వద్ద ఉస్మానియా విశ్వవిద్యాలయం (ఒయు) విద్యార్థులు గాంధీగిరికి దిగారు. ఒయు జెఎసి ఆధ్వర్యంలో విద్యార్థులు శనివారంనాడు గాంధీ టోపీలు ధరించి చంద్రబాబు ఇంటి ముందు నిరసన కార్యక్రమం చేపట్టారు. తెలంగాణపై స్పష్టమైన వైఖరి ప్రకటించాలని చంద్రబాబును కోరుతూ వారు గాంధీగిరికి దిగారు. మహాత్మా గాంధీ జయంతి సందర్భంగా వారు ఈ కార్యక్రమాన్ని చేపట్టారు.

చంద్రబాబుకు గులాబీ పువ్వులు ఇవ్వడానికి ప్రయత్నించారు. అయితే పోలీసులు వారిని అరెస్టు చేసి హైదరాబాదులోని జూబిలీహిల్స్ పోలీసు స్టేషన్ కు తరలించారు. చంద్రబాబు తెలంగాణపై రెండు నాల్కల ధోరణితో వ్యవహరిస్తున్నారనేది వారి ప్రధాన విమర్శ.