కొండా సురేఖ సలహాల వల్లనే వైయస్ జగన్ కు చెడ్డపేరు?

హైదరాబాద్: తమ పార్టీ శాసనసభ్యురాలు కొండా సురేఖ వల్లనే తమ పార్టీ కడప పార్లమెంటు సభ్యుడు వైయస్ జగన్ కు చెడ్డపేరు వస్తోందని కాంగ్రెసు సీనియర్ శాసనసభ్యుడు పి. శంకరరావు వ్యాఖ్యానించారు. తనపై కొండా సురేఖ చేసిన విమర్శలపై ఆయన సోమవారం మీడియా ప్రతినిధుల సమావేశంలో తీవ్రంగా మండిపడ్డారు. కొండా సురేఖపై తీవ్రమైన వ్యాఖ్యలు చేశారు. తనను విమర్శించే స్థాయి కొండా సురేఖకు లేదని ఆయన అన్నారు.

కాంగ్రెసు ప్రతిపక్షంలో ఉండగా తాను కొండా సురేఖపై ఉన్న పొటా కేసును ఎత్తివేయించేందుకు కృషి చేశానని ఆయన చెప్పారు. తాను వరంగల్ కు వెళ్లి సురేఖపై కేసు ఎత్తేయించానని ఆయన చెప్పారు. తనను విమర్శించడానికి సురేఖకు నోరెలా వచ్చిందని ఆయన అడిగారు. తాను తెరాస నాయకులతో కలిసి డ్యాన్స్ చేసినట్లు నిరూపించకపోతే కొండా సురేఖ ఉరేసుకుంటుందా అని ఆయన ప్రశ్నించారు. కొండా సురేఖ చరిత్ర ఏమిటి, ఆమె పార్టీకి చేసిన సేవలేమిటని ఆయన అన్నారు.