కవిత డిమాండ్ కు తలొగ్గిన ప్రభుత్వం: దసరా సెలవుల పెంపు

హైదరాబాద్: తెలంగాణ జాగృతి అధ్యక్షురాలు కవిత డిమాండ్ కు ప్రభుత్వం తలొగ్గింది. ప్రభుత్వం దసరా సెలవులను 9 నుంచి 18 వరకు పొడిగించింది. కళాశాల విద్యార్థులకు ఇంటర్ మీడియేట్ బోర్డు మొదట 5 రోజులే సెలవులు ప్రకటించింది. తెలంగాణ సంస్కృతికి అద్దం పట్టే అతి పెద్ద పండుగను గుర్తిస్తూ తిరిగి బోర్డు సెలవులను పొడిగించింది. తెలంగాణలో పెద్ద పండుగ అయిన బతుకమ్మ, దసరా పండుగకు ఐదు రోజులే సెలవులు ఇవ్వడంతో తెలంగాణ జాగృతి అధ్యక్షురాలు కవిత, తెలంగాణ లెక్చరర్స్ ఫోరం నాయకుల ఆధ్వర్యంలో ప్రభుత్వానికి దసరా సెలవులు పొడగించాల్సిందిగా విజ్ఞప్తి చేశారు.

తెలంగాణ పండుగ పట్ల ప్రభుత్వం వివక్ష ప్రదర్శిస్తోందని, అందుకే బతుకమ్మ పండుగకు సెలవులను తగ్గించిందని కవిత విమర్శిస్తూ వచ్చారు. ఆంధ్ర ఆధిపత్యంలోని కార్పొరేట్ కాలేజీల యాజమాన్యాలకు ప్రభుత్వం తలొగ్గిందని విమర్శించారు. దీంతో ప్రభుత్వం దిగి వచ్చి సెలవులను పెంచింది. దసరాకు ముందు తెలంగాణలో తొమ్మిది రోజులు, బతుకమ్మ పండుగ తొమ్మిది రోజులు ఉంటాయి. బతుకమ్మ మొదటి రోజు నుంచి మొదలు పెట్టి తొమ్మిదో రోజు చివరి రోజు సద్దుల బతుకమ్మ వరకు, ఆ తర్వాత దసరా పర్వదినం కలుపుకుని గతంలో విద్యాసంస్థలకు ప్రభుత్వం సెలవులు ఇచ్చేది. ఆ సెలపులను కుదించడంపై తెలంగాణలో ఆగ్రహం వ్యక్తమైంది.