మహేష్ బాబు ఖలేజాపై వాదనలు పూర్తి, తీర్పు వాయిదా

హైదరాబాద్: మహేష్ బాబు ఖలేజా సినిమా టైటిల్ పై వివాదం కొనసాగుతూనే ఉన్నది. టైటిల్ తనదేనంటూ విజయభాస్కర్ రెడ్డి అనే నిర్మాత వేసిన పిటిషన్ పై హైదరాబాదు సిటీ సివిల్ కోర్టులో మంగళవారం వాదనలు పూర్తయ్యాయి. న్యాయమూర్తి తీర్పును వాయిదా వేశారు. ఈ తీర్పు బుధవారం సాయంత్రంలోగా వెలువడుతుందని, అందువల్ల చిత్రం విడుదలకు ఏ విధమైన ఇబ్బంది ఉండదని ఖలేజా నిర్మాతలు అంటున్నారు. ఖలేజా ఈ నెల 7వ తేదీన విడుదల కావాల్సి ఉంది.

ఖలేజా ప్రింట్లు ఇప్పటికే దేశంలోని డిస్ట్రిబ్యూటర్లందరికీ చేరుకున్నాయని, 7వ తేదీన సినిమా విడుదలవుతుందని చిత్రం నిర్మాతలు అంటున్నారు. సెన్సార్ సర్టిఫికెట్ కూడా వచ్చేసిందని చెప్పారు. ఈ స్థితిలో సినిమా విడుదలపై ఏ విధమైన చర్యలు కూడా తీసుకోవద్దని వారు న్యాయమూర్తిని కోరారు. కాగా, తాను జూలైలో ఖలేజా టైటిల్ ను రిజిష్టర్ చేశానని, దానిపై పదేళ్ల వరకు తనకే హక్కులు ఉంటాయని విజయభాస్కర్ రెడ్డి వాదిస్తున్నారు.