వైయస్ జగన్ తన మూడో కొడుకంటున్న కాంగ్రెసు నేత కేశవరావు

హైదరాబాద్: కడప పార్లమెంటు సభ్యుడు వైయస్ జగన్ తనకు మూడో కుమారుడని కాంగ్రెసు సీనియర్ నేత కె. కేశవరావు అన్నారు. కేశవరావుపై వైయస్ జగన్ వర్గీయులు కత్తులు నూరుతుండగా కేశవరావు మాత్రం శాంతిమంత్రం జపిస్తున్నారు. ఓ తెలుగు టీవీ చానెల్ కార్యక్రమంలో ఆయన వైయస్సార్ పై ప్రశంసల జల్లు కూడా కురిపించారు. జగన్ తన కొడుకులాంటివాడని ఆయన అన్నారు. తాను చాలాసార్లు కొడుకా అని పిలిచేవాడినని, జగన్ తనను అంకుల్ అనేవాడని కేశవరావు చెప్పుకున్నారు. వైయస్ రాజశేఖర రెడ్డిని మించిన పాపులర్ ముఖ్యమంత్రి ఇప్పటి వరకు లేడని ఆయన అన్నారు. వైయస్ అత్యుత్తమ ముఖ్యమంత్రి అని ఆయన కొనియాడారు.

సమైక్యవాదులను కూడా ఆయన సమర్థించారు. తాను తెలంగాణను కోరుకుంటున్నట్లుగానే సమైక్యవాదులు సమైక్యరాష్ట్రాన్ని కోరుకుంటున్నారని, అందులో తప్పేమీ లేదని ఆయన అన్నారు. తాను మొదటి నుంచీ తెలంగాణ రాష్ట్ర ఏర్పాటు కోసం పోరాడుతున్నానని ఆయన చెప్పారు. కె. చంద్రశేఖర రావు తెలంగాణ రాష్ట్ర సమితి (తెరాస)ని ఏర్పాటు చేయడానికి ముందు నుంచి తమ కాంగ్రెసు పార్టీ నాయకులు తెలంగాణ రాష్ట్ర ఏర్పాటు కోసం పనిచేస్తున్నారని ఆయన చెప్పారు.