టిడిపి అధినేత పై మండిపడ్డ కాంగ్రెసు నేత జీవన్ రెడ్డి

హైదరాబాద్: రాష్ట్రంలో తెలుగు దేశాన్ని బలహీనపర్చాలని కాంగ్రెసు చూస్తుందని తెలుగు దేశం పార్టీ అధ్యక్షుడు, మాజీ ముఖ్యమంత్రి నారా చంద్రబాబునాయుడు వ్యాఖ్యానించటం పట్ల కాంగ్రెసు సీనియర్ సభ్యుడు జీవన్ రెడ్డి విలేకరుల సమావేశంలో ఆగ్రహం వ్యక్తం చేశారు. ఒక పార్టీని బలోపేతం చేయటం, బలహీనపర్చటం ఆ పార్టీ విధివిధానాల ద్వారా సాధ్యం అవుతుంది. కాని ఇతర పార్టీల వల్ల సాధ్యం కాదన్నారు. తెలంగాణకు వ్యతిరేకంగా ఉండటం వల్ల తెలంగాణలో తెలుగు దేశం పూర్తిగా కనుమరుగయ్యే పరిస్థితులు ఉన్నాయన్నారు.

ఎప్పుడు సొంతగా అధికారం చేపట్టలేని చంద్రబాబు 2009లో తెలంగాణకు అనుకూలంగా ఉన్నానని ప్రజలను మభ్యపెట్ట జూపి అధికారంలోని రావాలని చూచినప్పటికీ ప్రజలను ఆయన్ను తిప్పి కొట్టారని విమర్శించారు. 2009లో చంద్రబాబునాయుడు తెలంగాణ రాష్ట్ర సమితితో పొత్తు పెట్టుకొని ఎక్కువ సీట్లు గెలుచుకున్నాడని, లేకుంటే తెలంగాణకు వ్యతిరేకి ఆయిన ఆయనకు అన్ని సీట్లు వచ్చేవి కావన్నారు.

తెలంగాణకు అనుకూలమంటూ చెప్పుకొస్తున్న చంద్రబాబు డిసెంబర్ 9న కాంగ్రెసు ప్రభుత్వం ప్రత్యేక రాష్ట్రానికి అనుకూలంగా నిర్ణయం తీసుకుంటే దానిని చంద్రబాబు నీరుగార్చారని దుయ్యబట్టారు. ప్రతి పార్టీకి ప్రత్యామ్నాయం ఉండాలని, కాంగ్రెసు కు తెలుగు దేశం ప్రత్యామ్నాయంగా ఉండాలంటే తెలంగాణకు అనుకూలంగా చిత్తశుద్ది నిర్ణయం తీసుకోవాలని హితవు పలికారు.