20 మంది ఎమ్మెల్యేల రాజీనామా: సంక్షోభంలో యెడ్యూరప్ప ప్రభుత్వం

బెంగళూరు: కర్ణాటక ముఖ్యమంత్రి బిఎస్ యెడ్యూరప్ప ప్రభుత్వం మరింత సంక్షోభంలో పడింది. తీవ్ర అసంతృప్తికి లోనైన 20 మంది శాసనసభ్యులు రాజీనామా చేసినట్లు వార్తలు వస్తున్నాయి. దీంతో కర్ణాటకలో బిజెపి ప్రభుత్వం మరింతగా కష్టాల్లో పడింది. అసమ్మతి నాయకుడు, ఆబ్కారీ మంత్రి ఎంపి రేణుకాచార్యతో చర్చలు జరిపేందుకు వారంతా చెన్నై వెళ్లినట్లు బుధవారం వార్తలు వచ్చాయి. వరుస భూ కుంభకోణాలు వెలుగు చూస్తున్న నేపథ్యంలో యెడ్యూరప్పపై బిజెపి శానససభ్యులు తిరుగుబాటు బావుటా ఎగురేశారు.

ఇటీవలి పునర్వ్యస్థీకరణలో తమకు మంత్రి పదవులు రాకపోవడంతో, కనీసం కార్పొరేషన్ పదవులు కూడా దక్కకపోవడంతో రేణుకాచార్య నాయకత్వంలో అసమ్మతి గ్రూపు శాసనసభ్యులు ఏకమయ్యారు. కర్ణాటక పారిశ్రామిక ప్రాంత అభివృద్ధి బోర్డు భూయజమానులకు నష్టపరిహారం చెల్లింపులో జరిగిన అక్రమాలపై గవర్నర్ హెచ్ఆర్ భరద్వాజ రాష్ట్రపతి ప్రతిభా పాటిల్ కు నివేదిక సమర్పించడంతో అసమ్మతికి పునాదులు పడ్డాయి. కాగా, తన ప్రభుత్వానికి ఏ విధమైన ఢోకా లేదని యెడ్యూరప్ప అంటున్నారు.