తెలంగాణకు ఒప్పిస్తేనే చిరంజీవి ఫ్యాన్స్ తో మాట్లాడుతా: గద్దర్

హైదరాబాద్: ప్రజారాజ్యం పార్టీ అధ్యక్షుడు చిరంజీవి అభిమానులతో మాట్లాడడానికి తెలంగాణ ప్రజా ఫ్రంట్ నేత గద్దర్ నిరాకరించారు. గద్దర్ తో మాట్లాడేందుకు చిరంజీవి అభిమానులు గురువారం ప్రయత్నించారు. అయితే, వారిని కలుసుకోవడానికి గద్దర్ నిరాకరించారు. తెలంగాణలో చిరంజీవి, తెలుగుదేశం పార్టీ అధ్యక్షుడు నారా చంద్రబాబు నాయుడిని తిరగనిచ్చే విషయంపై ఫ్రంట్ లో చర్చించి నిర్ణయం తీసుకుంటామని ఆయన మీడియా ప్రతినిధులతో చెప్పారు.

తెలంగాణ ప్రజా ఫ్రంట్ రాజకీయ పార్టీ కాదని, ఓ ఉద్యమం సంస్థ మాత్రమేనని ఆయన స్పష్టం చేశారు. తెలంగాణ కోసం పోరాడుతున్న పార్టీలు, సంస్థలు, ప్రజల మధ్య ఓ లెన్స్ లా తమ ఫ్రంట్ పని చేస్తుందని ఆయన చెప్పారు. ఫ్రంట్ ఏర్పాటుపై ఇప్పటికే పలు జిల్లాల నాయకత్వాలతో సమీక్షలు జరిపామని, మరిన్ని జిల్లాల నాయకత్వాలతో సమీక్షలు నిర్వహిస్తామని ఆయన చెప్పారు. ఈ నెల 9వ తేదీన ఫ్రంట్ కు సంబంధించి కీలక నిర్ణయాలు తీసుకుంటామని ఆయన చెప్పారు.