కోడలిపై మామ అత్యాచారయత్నం: తన భర్తకు అత్త సహకారం

గుంటూరు: గుంటూరులో ఓ కీచక మామ ఉదంతం వెలుగు చూసింది. సొంత కోడలిపైనే మామ అత్యాచార యత్నానికి పాల్పడ్డాడు. గుంటూరు శివారులోని సీతమ్మ కాలనీలో బుధవారం ఈ దారుణం చోటు చేసుకుంది. తన కొడుకులకు పిల్లలు పుట్టడం లేదని మామ కోడలిపై అత్యాచార యత్నానికి ఒడిగట్టాడు. బంగారు ఏడుకొండలు, రమణమ్మ దంపతులకు ఇద్దరు కుమారులున్నారు. ఇద్దరు కొడుకులు వేంకటేశ్వర రావు, శ్రీనివాస రావులకు చాలా కాలం క్రితమే పెళ్లిళ్లు చేశారు. కానీ వారికి పిల్లలు కలగడం లేదు.

బుధవారంనాడు ఇద్దరు కుమారులు బయటకు వెళ్లిన సమయంలో చిన్న కోడలికి అత్త మత్తు మందు కలిపిన పాలు తాగించింది. ఆమెను గదిలో మంచానికి తాళ్లతో కట్టేసి భర్తను గదిలోకి పంపింది. భర్త ఏడుకొండలు కోడలిపై అత్యాచారానికి ప్రయత్నించాడు. సంతానం కోసమే అందుకు ఒడిగట్టినట్లు చెబుతున్నారు. దీంతో మెలుకువ వచ్చిన కోడలు పెద్దగా అరవడంతో చుట్టుపక్కల వాళ్లు వచ్చారు. విషయం పోలీసుల దాకా వెళ్లింది. బాధితురాలి భర్త నగరపాలెం పోలీసు స్టేషన్ లో ఫిర్యాదు చేశాడు. పోలీసులు కేసు నమోదు చేసుకున్నారు. బాధితురాలిని వైద్యపరీక్షల నిమిత్తం ప్రభుత్వాస్పత్రికి తరలించారు.