రాహుల్ గాంధీతో యోగా గురు బాబా రామ్ దేవ్ రహస్య భేటీ

న్యూఢిల్లీ: ఎఐసిసి ప్రధాన కార్యదర్శి, కాంగ్రెసు అధ్యక్షురాలు సోనియా గాంధీ కుమారుడు రాహుల్ గాంధీతో యోగా గురు రామ్ దేవ్ రహస్యంగా సమావేశమయ్యారు. గంటపాటు వారిద్దరి మధ్య భేటీ జరిగింది. సోనియా గాంధీతో కూడా రామ్ దేవ్ సమావేశమయ్యే అవకాశాలున్నాయి. ఈ విషయాన్ని రామ్ దేవ్ స్వయంగా ఓ జాతీయ చానెల్ కు తెలిపారు. దేశం ఎదుర్కుంటున్న కీలకమైన సమస్యలపై తాను రాహుల్ గాంధీతో చర్చలు జరిపినట్లు ఆయన చెప్పారు.

నల్లధనం గురించి, మావోయిస్టు సమస్యపై రాహుల్ తో మాట్లాడినట్లు ఆయన చెప్పారు. తాను సోనియా గాంధీతో భేటీ కోసం అడిగానని, గంట పాటు భేటీకి అవకాశం కల్పిస్తానని రాహుల్ తనకు చెప్పినట్లు ఆయన తెలిపారు. నల్లధనం గురించి ప్రధానితో మాట్లాడాలని తనకు రాహుల్ సూచించినట్లు ఆయన చెప్పారు. ప్రధానితో సమావేశానికి కూడా ఏర్పాట్లు చేస్తానని రాహుల్ హామీ ఇచ్చారని ఆయన చెప్పారు. రాహుల్ తో భేటీ తర్వాత బాబా రామ్ దేవ్ తన మనసు మార్చుకున్నట్లున్నారు. రాహుల్ గాంధీలో నిజాయితీ కనిపించిందని, చెప్తే వినడానికి సిద్ధంగా ఉంటారని ఆయన అన్నారు.