వైయస్ జగన్ ఓదార్పుకో మంత్రి ఉంటే బాగు: దాడి వీరభద్ర రావు

హైదరాబాద్: కాంగ్రెసు కడప పార్లమెంటు సభ్యుడు వైయస్ జగన్ ఓదార్పు యాత్రకు ఓ మంత్రిని నియమిస్తే బాగుంటుందని తెలుగుదేశం పార్టీ నాయకుడు దాడి వీరభద్రరావు వ్యాఖ్యానించారు. ముఖ్యమంత్రి రోశయ్యపై ఆయన శుక్రవారం మీడియా ప్రతినిధుల సమావేశంలో తీవ్ర వ్యాఖ్యలు చేశారు. మంత్రుల చేత పని చేయించాలని ఆయన ముఖ్యమంత్రిని కోరారు. మంత్రులు షాక్ లో ఉన్నారని, వారికి షాక్ ట్రీట్ మెంటు అవసరమని ఆయన అన్నారు. మంత్రులు తమ నియోజక వర్గాల మీదనే దృష్టి పెడుతున్నారని, రాష్ట్రాన్ని పట్టించకోవడం లేదని ఆయన అన్నారు. 16 సార్లు బడ్జెట్ ప్రతిపాదించిన ఏనుగు లాంటి రోశయ్యను మంత్రులు పీనుగులా మార్చారని ఆయన వ్యాఖ్యానించారు. రోశయ్య ప్రభుత్వం కోమాలో ఉందని, దాన్ని ఐసియులో పెట్టాలని ఆయన అన్నారు.

మైక్రో ఫైనాన్స్ విషయంలో కాంగ్రెసు నాయకుడు రాహుల్ గాంధీని తెలుగుదేశం మరో నేత రావుల చంద్రశేఖర రెడ్డి తప్పు పట్టారు. మైక్రో ఫైనాన్స్ లను రాహుల్ గాంధీ ప్రోత్సహించారని ఆయన విమర్శించారు. దానికి రాహుల్ గాంధీ వివరణ ఇవ్వాల్సి ఉంటుందని ఆయన అన్నారు. చట్టాన్ని సవరించి మైక్రో ఫైనాన్స్ బాధితులను ఆదుకోవాలని ఆయన ప్రభుత్వాన్ని కోరారు.