లగడపాటి రాజగోపాల్ కు వక్ఫ్ భూములు అప్పణంగా కట్టబెట్టారు: కెసిఆర్

హైదరాబాద్: కాంగ్రెసు పార్లమెంటు సభ్యుడు లగడపాటి రాజగోపాల్ కు అప్పణంగా ప్రభుత్వం వక్ఫ్ భూములను కట్టబెట్టిందని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు ఆరోపించారు. సమైక్య రాష్ట్రంలో ముస్లింలు అన్ని రంగాల్లో వెనుకబడ్డారన్నారు. 'తెలంగాణలోని 4 లక్షల కోట్ల విలువైన ముస్లింల భూములను ప్రభుత్వం బడాబాబులకు కట్టబెట్టిందని ఆయన అన్నారు. అవన్నీ ముస్లింలకు దక్కితే పేదరికం ఉంటుందా అని ఆయన అడిగారు. తెలంగాణ రాష్ట్రం ఏర్పాటైతే ముస్లింల బతుకుల్లో వెలుగులు నిండుతాయని టీఆర్ఎస్ అధినేత కేసీఆర్ ఉద్ఘాటించారు. గ్రేటర్ హైదరాబాద్‌కు చెందిన పలు పార్టీల నాయకులు ఆదివారం తెలంగాణ భవన్‌లో టీఆర్ఎస్‌లో చేరారు. ఈ సందర్భంగా కేసీఆర్ మాట్లాడారు.

లౌకికవాదానికి తెలంగాణ ప్రతీక అని అభివర్ణించారు. ప్రత్యేక రాష్ట్రంలో ఉప ముఖ్యమంత్రితో పాటు నాలుగైదు మంత్రి పదవులను ముస్లింలకు ఇస్తామని హామీ ఇచ్చారు. సచార్ కమిటీ సిఫారసులను, ముస్లింలకు 12 శాతం రిజర్వేషన్లను అమలు చేస్తామన్నారు. ఆంధ్రప్రదేశ్ ఏర్పాటుకు ముందు తెలంగాణలో 500 ఏళ్ల పాటు హిందూ, ముస్లింలు సహజీవనం చేశారని, హైదరాబాద్ చరిత్రలో మత ఘర్షణలు చోటుచేసుకోలేదని ఆయన అన్నారు. సెక్యులరిజానికి ప్రతీక తెలంగాణ అని అన్నారు.