పిసిసి షోకాజ్ నోటీసు: సోనియా గాంధీకి రాయపాటి సాంబశివ రావు లేఖ

హైదరాబాద్: ముఖ్యమంత్రి కె. రోశయ్యపై చేసిన వ్యాఖ్యలకు గాను ప్రదేశ్ కాంగ్రెసు కమిటీ (పిసిసి) క్రమశిక్షణా సంఘం చైర్మన్ కంతేటి సత్యనారాయణ రాజు పార్టీ పార్లమెంటు సభ్యుడు రాయపాటి సాంబశివరావును వివరణ అడిగారు. మంత్రివర్గ ప్రక్షాళన చెపట్టాలని, లేదంటే ముఖ్యమంత్రి పదవి నుంచి రోశయ్య తప్పుకోవాలని రాయపాటి సంచలన ప్రకటన చేశారు. దీనిపై కంతేటి వివరణ అడిగారు. తాను రోశయ్య మేలు కోసమే ఆ వ్యాఖ్య చేశానని రాయపాటి చెప్పారు. తాను రోశయ్యతో మాట్లాడడానికి సిద్ధంగా ఉన్నానని ఆయన చెప్పారు. పనిలో పనిగా రాయపాటి కాంగ్రెసు అధ్యక్షురాలు సోనియా గాంధీకి లేఖ రాశారు.

రాష్ట్రంలో పార్టీ పరిస్థితిని బాగుచేమని కోరుతూ ఎఐసిసి అధ్యక్షురాలు సోనియా గాంధీకి రాయపాటి సాంబశివరావు ఆ లేఖ రాశారు. రాష్ట్రంలో పార్టీ పరిస్థితి బాగా దిగజారిపోయిందని, మీరు జోక్యం చేసుకొని చక్కదిద్దాలని ఆ లేఖలో కోరారు. ఆ లేఖ ప్రతిని ముఖ్యమంత్రి కె.రోశయ్యకు కూడా రాయపాటి పంపారు. మంత్రి వర్గంలో అవినీతిపరులు ఉన్నారని, వారిని తొలగించి ప్రక్షాళన చేయాలని ఆయన అన్నారు. చేపట్టాల్సింది మంత్రి వర్గ విస్తరణ కాదని, ప్రక్షాళన అని ఆయన అన్నారు. మంత్రి కన్నా లక్ష్మినారాయణ ఆస్తులపై విచారణ జరిపించాలని ఆయన డిమాండ్ చేశారు.