మంత్రివర్గాన్ని విస్తరించు, లేదంటే దిగిపో: రోశయ్యతో రాయపాటి

న్యూఢిల్లీ: కాంగ్రెసు పార్లమెంటు సభ్యుడు రాయపాటి సాంబశివ రావు ఆదివారం సాయంత్రం సంచలన ప్రకటన చేశారు. మంత్రివర్గ విస్తరణ చేపట్టలేని స్థితిలో పదవి నుంచి దిగిపోవాలని ఆయన ముఖ్యమంత్రి రోశయ్యను కోరారు. మంత్రివర్గాన్ని ప్రక్షాళన చేసే సాహసాన్ని చేయకపోతే ముఖ్యమంత్రి రోశయ్య గౌరవంగా పదవి నుంచి తప్పుకోవడం మంచిదని ఆయన వ్యాఖ్యానించారు. ప్రస్తుత మంత్రులతోనే కొనసాగితే 2014 ఎన్నికల్లో పార్టీ నాశనం కావడం ఖాయమన్నారు. మంత్రివర్గంలో అవినీతి మంత్రులున్నారని, వాళ్ల కారణంగా మేము కూడా ప్రజల్లోకి వెళ్లలేకపోతున్నామని, చంద్రబాబును తిడితే ఆ పార్టీవారు వెంటనే తీవ్రంగా స్పందిస్తున్నారని, అదే ముఖ్యమంత్రి రోశయ్యను గానీ, కాంగ్రెస్ పార్టీని గానీ తిడితే స్పందించే మంత్రులే కరువయ్యారని ఆయన అన్నారు.

ఎన్నోసార్లు బడ్జెట్ ప్రవేశపెట్టిన ఆర్థిక మంత్రిగా రోశయ్యకు మంచి పేరు ఉందని, ఎవరు సహకరించినా సహకరించకపోయినా ఇప్పటి వరకూ అనుభవంతో రోశయ్య నెట్టుకొస్తున్నారని, ఇప్పుడు అధిష్ఠానం కూడా ఆయనకు సహకరించాలని ఆయన అన్నారు. ఇప్పుడు గట్టి చర్యలు తీసుకోకపోతే పార్టీకి నష్టమేనని, 2014లో రాహుల్‌గాంధీ ప్రధాని కావాలంటే కాంగ్రెస్‌ను బలోపేతం చేయాలని, ఇందుకు తక్షణమే మంత్రివర్గాన్ని పూర్తిగా ప్రక్షాళన చేయాలని ఆయన అన్నారు. అవినీతి మంత్రులను తొలగించడం మంచిదని ఇందుకు ముఖ్యమంత్రి రోశయ్య కూడా అధిష్ఠానం వద్ద గట్టిగా మాట్లాడాలని ఆయన అన్నారు. అధిష్ఠానం అనుమతి ఇవ్వకపోతే నా వల్ల కాదని చెప్పి రాజీనామా చేసి వైదొలగడం మంచిదని రాయపాటి సూచించారు.