సినిమాల్లో అవకాశం పేరుతో టోపీ పెట్టిన స్టార్ లైన్

హైదరాబాద్: రాజధాని నగరం హైదరాబాద్ లోని దిల్ సుఖ్ నగర్ ప్రాంతంలోని స్టార్ లైన్ అనే సంస్థ సినిమాలలో ఆవకాశం పేరుతో యువతకు కుచ్చుటోపి పెట్టింది. దీంతో బాధితులు స్టార్ లైన్ దిల్ సుఖ్ నగర్లోని స్టార్ లైన్ కార్యాలయం ముందు ఆందోళనకు దిగారు. తమకు న్యాయం జరిగే వరకు ఆందోళన చేస్తామన్నారు. సినిమాలలో నటించాలనే ఆసక్తి ఉన్నావారు తమను సంప్రతించాలని చెప్పి, అవకాశం కోసం ముందుగా తమకు కొంత డబ్బు ఇవ్వాలని తమ దగ్గరనుండి డబ్బులు తీసుకుని అటు అవకాశాలు ఇప్పించకుండా, ఇటు తమ డబ్బులు ఇవ్వకుండా తిప్పించుకుంటున్నారని బాధితులు ఆవేదన వ్యక్తం చేశారు.

సినిమాలలో అవకాశం ఇప్పిస్తామని చెప్పి డబ్బులు తీసుకొని ఆ తర్వాత ముఖం చాటేస్తున్న సంస్థలు హైదరాబాదులో పుట్టగొడుగుల్లా పుట్టుకొస్తున్నాయి. రాష్ట్రంలోని వివిధ ప్రాంతాలనుండి సినిమాపట్ల ఆసక్తి ఉన్నవారు నగరానికి వస్తుంటారు. వారికి వెండితెరపై ఒక్కసారన్నా కనిపించాలన్న ఆశ ఉంటుంది. అలాంటి వారిని పేపర్లలో యాడ్ ద్వారా మభ్యపెట్టి డబ్బులు తీసుకొని వారిని తిప్పుంచుకుంటాయి. చాలామందిలో ఉన్న సినిమా వీక్ నేస్ ను వీరు సొమ్ము చేసుకుంటున్నారు.