వైఎస్ జగన్మోహన్ రెడ్డి అన్ని కోట్లు ఎలా సంపాదించాడు

హైదరాబాద్: కడప పార్లమెంటు సభ్యుడు వైఎస్ జగన్ రూ.84 కోట్లు చెల్లించేంత ఆస్తి ఎక్కడినుండి వచ్చిందని తెలుగు దేశం పార్లమంటు సభ్యుడు ఎర్రంనాయుడు విలేకరుల సమావేశంలో ప్రశ్నించారు. 6 ఏళ్ల క్రితం 44 లక్షల ఆస్తి చూపించిన వైఎస్ రాజశేఖర్ రెడ్డి కుమారుడు జగన్ ఇప్పుడు రూ.84 కోట్లు ముందస్తు పన్ను చెల్లించటంపై ఆంధ్ర ప్రదేశ్ ప్రజలు ఆశ్చర్యపోతున్నారని అన్నారు. టాటా, బిర్లా, అంబానీలవంటి పారిశ్రామిక వేత్తలకు సాధ్యం కానిది జగన్ కెలా సాధ్యం అయ్యిందన్నారు.

మరో తెలుగు దేశం నేత యనమల రామకృష్ణుడు జగన్ ఆస్తులపై వెంటనే సిబిఐ విచారణ జరిపించాలని డిమాండ్ చేశారు. పెద్ద పెద్ద పారిశ్రామిక వేత్తలకు సాధ్యం కాని విధంగా ముందస్తు పన్నును 84 కోట్ల రూపాయలను చెల్లించాడన్నారు. ఆయన ఆస్తులపై అనుమానాలు కలుగుతున్నాయని అందుకే సిబిఐ ఎంక్వయిరీ అడుగుతున్నామన్నారు.