వైయస్ జగన్ అపర కుబేరుడు: అడ్వాన్స్ ట్యాక్సే రూ.84 కోట్లు

హైదరాబాద్: ఆదాయంలో వైయస్ జగన్ అపర కుబేరుడిగా అవతారమెత్తారు. టాటాలను, బిర్లాలను కూడా మించిపోయారు. 2010-11 సంవత్సరం మొదటి ఆరు నెలలకు గాను ఆయన 84 కోట్ల రూపాయల ముందస్తు పన్ను చెల్లించారు. ఈ అడ్వాన్స్ ట్యాక్స్ ను బట్టి జగన్ వార్షికాదాయం 520 కోట్ల రూపాయలు ఉంటుందని అంచనా. ఇది 11 వందల శాతం పెరుగుదలను సూచిస్తోంది. రాజకీయ నేతల్లో జగన్ దే రికార్డు. 2008-09 ఆర్థిక సంవత్సరానికి ఆయన 2.92 కోట్ల రూపాయల పన్ను చెల్లించారు. 2009-10కి గాను ఆయన 6.7 కోట్ల పన్ను చెల్లించారు. ఆయన పన్ను చెల్లింపు 12.53 రెట్లు పెరిగింది.

ఆయన వార్షికాదాయమే 520 కోట్ల రూపాయలు ఉందంటే ఆస్తుల విలువ ఎంత ఉంటుందో ఊహించుకోవచ్చు. ఆయనకు ప్రధాన ఆదాయ వనరు గనుల తవ్వకాలే. ఆయన ఆదాయంలో గాలి సోదరులను మించిపోయారు. కర్ణాటక మంత్రి గాలి జనార్దన్ రెడ్డి భార్య లక్ష్మీఅరుణ 7 కోట్ల రూపాయలు తొలి ఆరు నెలలకు గాను అడ్వాన్స్ ట్యాక్స్ చెల్లించారు. అధిష్టానానికి వ్యతిరేకంగా వ్యవహరిస్తున్నందున ఆదాయం పన్ను చెల్లింపులకు సంబంధించి ఇబ్బందులు వస్తాయనే ముందు చూపుతోనే వైయస్ జగన్ ఆ పన్ను చెల్లించినట్లు చెబుతున్నారు.