69 రోజుల తర్వాత బయటపడిన తొలి చిలీ గని కార్మికుడు

సాన్ జోస్ మైన్: బంగారు గనిలో చిక్కుకున్న 33 మంది కార్మికుల్లో ఒక కార్మికుడు 69 రోజుల తర్వాత సురక్షితంగా బయటపడ్డాడు. చిలీలోని బంగారు గని కూలిపోవడంతో 33 మంది కార్మికులు పది వారాల క్రితం గనిలో చిక్కుకుపోయారు. ఆ శిథిలాల నుంచి సురక్షితంగా బయటపడిన ఫ్లోరెన్సియో అవెలోస్ అనే కార్మికుడ్ని కుటుంబ సభ్యులు ఆలింగనం చేసుకుని తన సంతోషాన్ని వ్యక్తం చేశారు. మంగళవారం అర్ధరాత్రి సమయంలో అతను సురక్షితంగా బయటకు వచ్చాడు. ఎమర్జెన్సీ వర్కర్ మాన్యూయెల్ గొంజాల్వెజ్ గనిలో చిక్కుకున్నవారు ప్రాణాలతో ఉన్నారని గుర్తించడంతో సహాయక చర్యలు ప్రారంభమయ్యాయి.

ఆగస్టు 5వ తేదీన కార్మికులు బంగారు గనిలో చిక్కుకుపోయారు. అర మైలు గల గనిలోకి దిగడానికి గొంజాల్వెజ్ 17 నిమిషాలు తీసుకున్నాడు. ఆక్సిజన్ మాస్కులున్న ప్రత్యేకంగా తయారు చేసిన ఉక్కు బోను ద్వారా అవెలోస్ బయటకు వచ్చాడు. కార్మికులు చనిపోయారనే 17 రోజుల వరకు అందరూ నమ్ముతూ వచ్చారు. వారు బతికి ఉన్నారనే విషయం బయటపడగానే ప్రపంచం దృష్టి అటు వైపు మళ్లింది. 31 ఏళ్ల అవెలోస్ కు ఇద్దరు పిల్లలున్నారు. తన సోదరుడు రేనన్ తో కలిసి అతను గనిలో చిక్కుకున్నాడు.