హైదరాబాదులో రేపు కవిత కోటి బతుకమ్మల జాతర

హైదరాబాద్: తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు కూతురు, తెలంగాణ జాగృతి అధ్యక్షురాలు కల్వకుంట్ల కవిత ఆధ్వర్యంలో రేపు శుక్రవారం హైదరాబాదులో కోటి బతుకమ్మల జాతర జరగనుంది. జాతరకు పోలీసులు అనుమతి ఇవ్వకపోవడంతో హైకోర్టుకు ఎక్కారు. హైకోర్టు కోటి బతుకమ్మల జాతరకు గ్రీన్ సిగ్నల్ ఇచ్చింది. ఇది తెలంగాణ మహిళల విజయమని కవిత మీడియా ప్రతినిధులతో అన్నారు. ఆమె బతుకమ్మల జాతర జరిగే ప్రాంతాన్ని గురువారం పరిశీలించారు. బతుకమ్మలను నిమజ్జనం చేసే హుస్సేన్ సాగర్ ప్రాంతాన్ని కూడా పరిశీలించారు.

అంబేడ్కర్ విగ్రహం వద్ద మహిళలు బతుకమ్మ ఆడుతారని, ఆ తర్వాత హుస్సేన్ సాగర్ లో నిమజ్జనం చేస్తారని కవిత చెప్పారు. తెలంగాణకు చెందిన 9 జిల్లాల నుంచి పెద్ద యెత్తున మహిళలు జాతరకు తరలి వస్తారని ఆమె అన్నారు. తొమ్మిది రోజుల పాటు బతుకమ్మ ఆట సాగుతుంది. తొమ్మిదో రోజు ముగుస్తుంది. తొమ్మిదో రోజు బతుకమ్మను సద్దుల బతుకమ్మ అంటారు. సద్దుల బతుకమ్మ సందర్భంగా కోటి బతుకమ్మల జాతరను కవిత హైదరాబాదులో తలపెట్టారు.