స్కాట్లాండులో భారతీయ యువకుడిపై జాతి వివక్ష దాడి

లండన్‌: స్కాట్‌లాండ్‌లోని ఎడిన్‌బరోలో భారత్‌కు చెందిన ఓ వ్యక్తిపై జాతివివక్ష దాడి జరిగింది. ఓ మహిళను కాపాడే యత్నంలో ఈ దాడి జరిగింది. దుస్తుల దుకాణంలో సహాయకుడిగా పనిచేసే పంకజ్‌రావత్‌(21) పార్టీలో పాల్గొని రాత్రి ఇంటికి వెళ్తుండగా ఐదుగురు యువకులు ఓ మహిళను అటకాయించడం చూశాడు. ఆమె సహాయం కోసం కేకలు వేయగా పంకజ్‌ వెళ్లి అడ్డుకున్నాడు. దీంతో వారు కోపోద్రిక్తులై పంకజ్‌పై దాడికి దిగారు.

ఎక్కడి నుంచి వచ్చావంటూ పంకజ్‌నే అడిగి తెలుసుకుని 'భారత లం...' అంటూ వివక్షపూరిత వ్యాఖ్యలు చేశారు. ఒకడు పిడిగుద్దులు కురిపించి కిందపడేయగా మరొకడు కాలితో ఇష్టమొచ్చినట్లు తన్నాడు. ఈ దాడిలో పంకజ్‌ దవడ ఎముక విరగడంతో లోహపు ప్లేటు అమర్చారు. తీవ్రగాయాల కారణంగా 3 వారాల సెలవు పెట్టాల్సి వచ్చింది. దుకాణం యాజమాన్యం అందుకు సమ్మతించకపోవడంతో ఉద్యోగం కోల్పోవాల్సి వచ్చింది.