కొడుకు లోకేష్ చానెల్ ఉద్వాసనలు: మీడియాపై చంద్రబాబు చిర్రుబుర్రు

హైదరాబాద్: తన కుమారుడు లోకేష్ సిఇవోగా ఉన్న స్టూడియోఎన్ తో తనకు సంబంధం లేదని తెలుగుదేశం పార్టీ అధ్యక్షుడు నారా చంద్రబాబు నాయుడు చెప్పారు. స్టూడియోఎన్ నుంచి ఉద్యోగులను తొలగించడంపై కొంత మంది మీడియా ప్రతినిధులు శనివారం మీడియా సమావేశంలో వేసిన ప్రశ్నలకు ఆయన చిర్రుబుర్రులాడారు. స్టూడియోఎన్ ఉద్యోగులకు ఉద్వాసన పలకడంపై తనను ప్రశ్నించడమంటే రాజకీయం చేయడమేనని భాష్యం చెప్పారు. స్టూడియోఎన్ నుంచి ఉద్వాసనకు గురైన ఉద్యోగులు శనివారం తెలుగుదేశం పార్టీ కార్యాలయం ముందు ధర్నా చేశారు. కాగా, రాజ్ న్యూస్, సాక్షి టీవీ చానెల్ జర్నలిస్టుల ఆందోళనను విస్తృతంగా ప్రసారం చేస్తున్నాయి. మైక్రో ఫైనాన్స్ లపై, రైతు సమస్యలపై అఖిల పక్ష సమావేశం అనంతరం చంద్రబాబు మీడియా సమావేశం ఏర్పాటు చేశారు. ఈ మీడియా సమావేశంలో స్టూడియోఎన్ నుంచి ఉద్వాసనకు గురైన ఉద్యోగుల గురించి కొంత మీడియా ప్రతినిధులు చంద్రబాబును ప్రశ్నించారు.

ఎన్టీఆర్ ట్రస్ట్ భవన్ వద్ద ఆందోళన చేస్తున్న స్టూడియోఎన్ బాధిత ఉద్యోగులను పోలీసులు అరెస్ట్ చేశారు. బాధిత జర్నలిస్టులు ట్రస్గ్ భవన్ వద్ద బిక్షాటన చేశారు. ఈ సందర్భంగా పలువురు జర్నలిస్టులను పోలీసులు అరెస్ట్ చేశారు. ఇక్కడ అఖిలపక్ష సమావేశం జరుగుతుందని తెలిసి, వినతి పత్రం ఇవ్వడానికి వస్తే తమని అరెస్ట్ చేయించారని బాధితులు ఆవేదన వ్యక్తం చేశారు. మైక్రో ఫైనాన్స్ బాధితుల ఆత్మహత్యలపై ఆందోళన చేస్తున్న తెలుగుదేశం పార్టీ అధ్యక్షుడు చంద్రబాబు నాయుడు తమ బాధలు పట్టించుకోవడంలేదన్నారు. ఏ కారణం చూపకుండా స్టూడియోఎన్ ఉద్యోగులను రేపటి నుంచి రావద్దని చెప్పి తొలగించారని చెప్పారు. సమయం కూడా ఇవ్వకుండా ఇలా తొలగిస్తే ఉద్యోగుల కుటుంబాల పరిస్థితి ఏమిటని వారు ప్రశ్నించారు. ఒక జర్నలిస్ట్ నిన్న ఆత్మహత్యాయత్నం చేసుకున్నారని తెలిపారు. అతను ఆస్పత్రిలో చికిత్స పొందుతున్నట్లు చెప్పారు. తొలగించినవారిని వెంటనే ఉద్యోగంలోకి తీసుకోవాలని వారు డిమాండ్ చేశారు.