అన్న కెటి రామారావుకు సవాల్ విసిరిన కెసిఆర్ కూతురు కవిత

హైదరాబాద్: కోటి బతుకమ్మల జాతరను నిర్వహించడం ద్వారా తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు కూతురు, తెలంగాణ జాగృతి అధ్యక్షురాలు కల్వకుంట్ల కవిత తన సత్తా చాటుకున్నారు. శుక్రవారం సాయంత్రం హైదరాబాదులోని ట్యాంక్ బండ్ వద్ద జరిగిన బతుకమ్మ ఉత్సవానికి తెలంగాణలోని అన్ని జిల్లాలోని మహిళలు పెద్ద యెత్తున తరలి వచ్చారు. అదొక సంరంభంలా సాగింది. ఈ ఉత్సవాలకు ఆమె తమిళనాడు ముఖ్యమంత్రి కరుణానిధి కూతురు కనిమొళిని కూడా రప్పించగలిగారు. బతుకమ్మ పండుగకు వచ్చిన మహిళలందరూ కవిత పేరే చెప్పారు. ఆమెనే కొనియాడారు. ఇటువంటి సంరంభం కనీవినీ ఎరుగబోమని చెప్పారు. తెలంగాణలో పాటలు పాడే స్త్రీలు, అమ్మాయిలు చాలా మంది ఉన్నారు. వారిని తన చెంతకు చేర్చుకోగలిగారు. టీవీ చానెళ్లు అన్నింటిలో బతుకమ్మ పాటలను మారుమోగించారు. లైవ్ షోలు పెట్టించారు. మిగతా విషయాలను పక్కన పెట్టేసి బతుకమ్మనే ప్రధాన చర్చనీయాంశంగా చేయడంలో ఆమె విజయం సాధించారు.

తెలంగాణకే ప్రత్యేకమైన బతుకమ్మ పాట ద్వారా తెలంగాణ రాష్ట్ర ఏర్పాటు ఉద్యమానికి తెలంగాణ మహిళలను సమీకృతం చేయడంలో ఆమె విజయం సాధించారనే చెప్పాలి. మహిళా రాజకీయ శక్తిని సమీకరించే పనిలో ఆమె చాలా వరకు సఫలమయ్యారని చెప్పవచ్చు. తెలంగాణ రాష్ట్ర సమితి (తెరాస)తో ఆమెకు సంబంధం లేదు. తన అన్న కెటి రామారావు పార్టీలో ఉండడంతో ఆమెకు పార్టీలో చోటు దక్కలేదు. అంతేకాకుండా, గత ఎన్నికల్లో శాసనసభకు పోటీ చేయాలనే ప్రయత్నం కూడా ఫలించలేదు. ఈసారి, ఆమెను కాదనే పరిస్థితి కెసిఆర్ కు గానీ, కెటి రామారావుకు గానీ ఉండకపోవచ్చు. ఆమె రాజకీయ జీవితాన్ని అడ్డుకోవడానికి కెటి రామారావు ప్రయత్నిస్తున్నారనే ప్రచారం కూడా జరిగింది. బతుకమ్మ జాతర నిర్వహణ ద్వారా కవిత తన అన్నకు సవాల్ విసిరారనే మాట వినిపిస్తోంది.