తెలుగుదేశం పార్టీ అధినేత చంద్రబాబుకు మంత్రి గీతారెడ్డి కౌంటర్

హైదరాబాద్: ప్రధాని డాక్టర్ మన్మోహన్ సింగ్ పై విమర్శలు చేసిన తెలుగుదేశం పార్టీ అధినేత నారా చంద్రబాబు నాయుడిపై మంత్రి జె. గీతారెడ్డి తీవ్రంగా మండి పడ్డారు. చంద్రబాబు సంస్కృతి ఇదేనా అని ఆమె మంగళవారం మీడియా ప్రతినిధుల సమావేశంలో ప్రశ్నించారు. దేశాన్ని ఆర్థిక మాంద్యం నుంచి బయటపడేసిన ఘనత మన్మోహన్ సింగ్ దని, మన్మోహన్ సింగ్ ను పట్టుకుని విమర్శలు చేయడం చంద్రబాబుకు తగదని ఆమె అన్నారు. వెన్నుపోటు పొడిచి ముఖ్యమంత్రి పీఠంపై కూర్చున్న చంద్రబాబుకు త్యాగాల గురించి తెలియదని, సోనియా గాంధీ గాంధీ కుటుంబంవారు త్యాగాలు చేశారని ఆమె అన్నారు.

ప్రధానిని ఏమైనా అంటే సమాజం చీపురుకట్టలు పట్టుకుని కొడుతుందని ఆమె హెచ్చరించారు. ప్రధానిపై విమర్శలు చేస్తే సహించబోమని ఆమె అన్నారు. కుళ్లు రాజకీయాలకు, దిగజారుడు రాజకీయాలకు తెలుగుదేశం పార్టీ నాయకుడు గాలి ముద్దుకృష్ణమనాయుడు నిదర్శమని ఆమె అన్నారు. దేశ ఆర్థిక పరిస్థితిని చక్కదిద్దిన మన్మోహన్ ను ప్రశంసించకపోయినా ఫరవాలేదని, విమర్శలు మాత్రం చేయవద్దని ఆమె సూచించారు. పార్టీలు మార్చే సంస్కృతి ముద్దుకృష్ణమనాయుడిదని ఆమె అన్నారు.