ఆ తర్వాత తెలంగాణ రాష్ట్ర ప్రకటనకు 20 రోజుల గడువే: కెసిఆర్

హైదరాబాద్‌: శ్రీకృష్ణ కమిటీ నివేదిక ఇచ్చిన తర్వాత తెలంగాణపై కేంద్ర ప్రభుత్వ ప్రకటనకు 20 రోజుల గడువు ఇస్తామని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు చెప్పారు. ఆ తర్వాత తెలంగాణ కోసం వ్యూహాత్మకంగా ఉద్యమిస్తామని ఆయన చెప్పారు. నిజామాబాద్ జిల్లాకు చెందిన తెలుగుదేశం నాయకులు, కార్యకర్తలు మంగళవారం సాయంత్రం తెరాసలో చేరారు. ఈ సందర్భంగా కెసిఆర్ మాట్లాడారు. తెలంగాణపై కాంగ్రెసు అధ్యక్షురాలు సోనియా గాంధీ ఇంటి ముందు ధర్నా చేయాలని నిర్ణయించిన తెలుగుదేశం తెలంగాణ ప్రాంత నేతలపై ఆయన తీవ్రంగా ధ్వజమెత్తారు. నారా చంద్రబాబుతో శ్రీకృష్ణ కమిటీకి తెలంగాణకు అనుకూలంగా నివేదిక ఇప్పించలేని తెలుగుదేశం తెలంగాణ ప్రాంత నాయకులు తెలంగాణ కోసం పోరాడుతామంటే నమ్మడమెలా అని ఆయన ప్రశ్నించారు.

తెలంగాణ రాష్ట్ర ఏర్పాటుకు కేంద్ర ప్రభుత్వం చేసిన ప్రకటనను సీమాంధ్ర నాయకులు అడ్డుకున్నారని ఆయన విమర్శించారు. తెలంగాణకు అడ్డుపడుతున్నది తెలుగుదేశం పార్టీయే అని ఆయన అన్నారు. పదేళ్ల కింద తాను చెప్పినట్లే తెలంగాణవాదులంతా ఒక్క దిక్కు వస్తున్నారని ఆయన అన్నారు. తెలంగాణ ప్రాజెక్టులకు కేటాయించిన నిధులను గద్దల్లా తన్నుకుపోతున్నారని ఆయన విమర్శించారు. తెలంగాణ ఇచ్చేవారు, తెచ్చేవారు ఎవరూ లేరని, ప్రజలే తెలంగాణను తెచ్చుకుంటారని ఆయన అన్నారు. వచ్చే నెల 9వ తేదీన వరంగల్ లో జరిగే బహిరంగ సభ ద్వారా కేంద్రానికి తెలంగాణపై ఓ హెచ్చరిక పంపుతామని ఆయన అన్నారు.