తెలంగాణపై సీనియర్లతో పీపుల్స్ ట్రిబ్యునల్ కమిటీ ఏర్పాటు

హైదరాబాద్‌ : తెలంగాణపై శ్రీకృష్ణ కమిటీలోని సభ్యుల కన్నా సీనియర్లతో కమిటీ వేయాలని చిన్న రాష్ట్రాల సమాఖ్య నిర్ణయించింది. ఈ విషయాన్ని సమాఖ్య కన్వీనర్ నిరూప్ రెడ్డి ప్రకటించారు. శ్రీకృష్ణ కమిటీపై తెలంగాణ ప్రజలకు నమ్మకం లేదని ఆయన అన్నారు. తాము వేసే కమిటీలో కుష్వంత్ సింగ్, కుల్దీప్ నయ్యర్, బిజీ వర్గీస్, లోకసభ మాజీ సెక్రటరీ జనరల్ సుభాష్ కశ్యప్, సామాజిక రచయిత్రి మైత్రేయ పుష్ప ఉంటారని ఆయన చెప్పారు. తెలంగాణకు సంబంధించినంత వరకు డిసెంబర్ 31వ తేదీ అత్యంత ప్రధానమైన రోజని అన్నారు. ఒక రాష్ట్రం ఏర్పాటుకు ఇంత తంతు అవసరం లేదని ఆయన అన్నారు.

తమ సమాఖ్య నాయకుడు అమర్ సింగ్ ఆదిలాబాద్ వస్తారని, తెలంగాణ కోసం జరిగిన ఆత్మహత్యల అంచనాకు అమర్ సింగ్ వస్తున్నారని ఆయన చెప్పారు. తాము కమిటీ వేయడంలో జాప్యం జరిగిన మాట వాస్తవమేనని, అయితే తెలంగాణ కోసం నిజాయితీగా కమిటీ నివేదిక సమర్పిస్తుందని ఆయన అన్నారు. శ్రీకృష్ణ కమిటీ నివేదిక తెలంగాణ రాష్ట్ర ఏర్పాటుకు వ్యతిరేకంగా ఉంటుందని నమ్ముతున్నట్లు ఆయన తెలిపారు.