ఓబామా సామర్థ్యంపై 73 శాతం ఇండియన్లకు నమ్మకం

వాషింగ్టన్: అమెరికా అధ్యక్షుడు బరాక్ ఒబామా వచ్చే నెలలో భారత దేశంలో పర్యటించనున్న నేపథ్యంలో ఆసక్తికరమైన విషయాలు వెల్లడయ్యాయి. పది మందిలో ఏడుగురు భారతీయులు ఓబామాపై విశ్వాసం వ్యక్తం చేశారు. అమెరికా పట్ల సానుకూల వైఖరిని ప్రకటించారు. ప్రపంచ వ్యవహారాల్లో భారత పాత్ర పట్ల కూడా భారతీయులు సానుకూల దృక్పథాన్ని వ్యక్తం చేశారు. పియూ రీసెర్చ్ సెంటర్ నిర్వహించిన సర్వేలో ఈ విషయాలు బయట పడ్డాయి. భారత ఆర్థిక భవిష్యత్తు పట్ల ఆశావహ దృక్పథాన్ని ప్రకటించారు. భారత్ లష్కరే తోయిబా, పాకిస్తాన్ ల నుంచి ముప్పును ఎదుర్కుంటోందని అభిప్రాయపడ్డారు. 73 శాతం మంది భారతీయులు ఒబామా సామర్థ్యంపై విశ్వాసం వ్యక్తం చేశారు.

ప్రధాని డాక్టర్ మన్మోహన్ సింగ్ కు 87 శాతం మంది భారతీయులు ఓటేశారు. సోనియా గాంధీకి కూడా 87 శాతం మంది ఓటేశారు. రాహుల్ గాంధీ పట్ల 85 శాతం మంది సానుకూల వైఖరి వ్యక్తం చేశారు. అమెరికా పట్ల భారతదేశంలో ఎంతో సానుకూల వైఖరి ఉందని రీసెర్చ్ సెంటర్ ప్రకటించింది. అమెరికా పట్ల 66 శాతం మంది సానుకూల దృక్పథాన్ని కలిగి ఉన్నట్లు తెలిపింది. అయితే నిరుటి కన్నా అది తక్కువేనని తేల్చింది. నిరుడు 76 శాతం మంది సానుకూల దృక్పథాన్ని కలిగి ఉన్నట్లు వెల్లడించింది. రష్యా పట్ల 51 శాతం మంది సానుకూల దృక్పతం కలిగి ఉన్నట్లు తెలిపింది. యూరోపియన్ యూనియన్ పట్ల 36 శాతం మంది, చైనా పట్ల 34 శాతం మంది మాత్రమే సానుకూల వైఖరితో ఉన్నట్లు తెలిపింది.