సెక్స్ కోసమే సహజీవనమైతే ఆ ప్రయోజనాలు ఉండవు: సుప్రీం

న్యూఢిల్లీ: సెక్స్ కోసమే ఓ పురుషుడు స్త్రీతో సహజీవనం చేస్తే పెళ్లి ద్వారా జీవిత భాగస్వామికి సంక్రమించే ప్రయోజనాలు వర్తించవని సుప్రీంకోర్టు గురువారం సంచలనాత్మక వ్యాఖ్య చేసింది. పురుషుడు ఆర్థికంగా పోషిస్తూ సేవకురాలిగా పురుషుడు సెక్స్ కోసం స్త్రీని ఉంచుకుంటే ఆ సంబంధానికి పెళ్లి సంబంధ స్వభావం ఉండదని స్పష్టం చేసింది. 14 ఏళ్ల పాటు సహజీవనం చేసి విడిపోయిన ఓ జంట కేసులో సుప్రీంకోర్టు ఆ వ్యాఖ్యలు చేసింది. అటువంటి స్త్రీకి మెయింటెనెన్స్ ఇవ్వాల్సి ఉంటుందని అంతకు ముందు తమిళనాడు ట్రయల్ కోర్టు తీర్పు చెప్పింది.

ట్రయల్ కోర్టు తీర్పును కేసుకు సంబంధించిన పురుషుడు హైకోర్టులో సవాల్ చేశాడు. హైకోర్టు కూడా స్త్రీకి అనుకూలంగానే తీర్పు చెప్పింది. దాంతో అతను సుప్రీంకోర్టుకు వెళ్లాడు. సెక్స్ కోసం సహజీవనం సాగించిన స్త్రీ మిస్ట్రెస్ లేదా భార్యకు సమానం అవుతుందా స్పష్టం చేయాలని అతను సుప్రీంకోర్టును కోరాడు. సెక్స్ కోసం స్త్రీపురుషులు సహజీవనం చేస్తే దానికి పెళ్లి స్వభావం ఉండదని, అలాంటి స్త్రీకి పెళ్లి ద్వారా సంక్రమించే హక్కులు ఉండవని సుప్రీంకోర్టు స్పష్టం చేసింది.