రామ్ గోపాల్ వర్మను అనంతపురంలో అడ్డుకుంటాం: బిజెపి

అనంతపురం: రక్తచరిత్ర చిత్ర దర్శకుడు రామ్ గోపాల్ వర్మ అనంతపురం వస్తే అడ్డుకొని తీరుతామని భారతీయ జనతా పార్టీ జిల్లా కార్యవర్గం హెచ్చరించింది. అనంతపురాన్ని కక్ష్యలకు, కారుణ్యాలకు నిలయంగా చూపించడాన్ని వ్యతిరేకిస్తున్నట్లు చెప్పారు. జిల్లా బిజెపి నాయకులు డిఐజికి ఓ వినతి పత్రాన్ని కూడా అందజేశారు. ఉద్రిక్త వాతావరణం నెలకొనటంతో వర్మ తన అనంత పర్యటనన రద్దు చేసుకున్నాడు. హైదరాబాద్ లోనే చిత్రాన్ని చూడడానికి నిశ్చయించుకున్నాడు.

కాగా అనంతపురం నగర శివార్లలో రక్తచరిత్ర పోస్టర్లు వెలిశాయి. ఆ పోస్టర్లను పలు విద్యార్థి సంఘాలు కలిసి దగ్ధం చేశాయి. అనంతపురం జిల్లా వ్యాప్తంగా ఈ చిత్రం 10 థియేటర్లలో విడుదల అవుతుంది. అనంతపురం పట్టణంలోనే 3 ధియేటర్లలో విడుదల అవుతుంది. అయితే ఏ థియేటర్లలో విడుదలవుతాయో ఖచ్చితమైన సమాచారం లేదు. ఇక రామ్ గోపాల్ వర్మ అనంతపురం వస్తున్నట్లు తమకు తెలియదని పోలీసులు అన్నారు. పోలీసులు అనుమతితోనే చిత్రాన్ని విడుదల చేస్తున్నట్టు థియేటర్ యాజమాన్యాలు చెబుతున్నాయి.