కెసిఆర్ పై రోశయ్యకు కాంగ్రెసు హైకమాండ్ ముందుస్తు హెచ్చరిక

హైదరాబాద్: తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు విషయంలో ముఖ్యమంత్రి కె.రోశయ్యకు కాంగ్రెసు పార్టీ అధిష్టానం ముందస్తు హెచ్చరికలు జారీ చేసినట్లు తెలుస్తోంది. శ్రీకృష్ణ కమిటీ నివేదిక సమర్పించిన తర్వాత కెసిఆర్ చేపట్టబోయే ఉద్యమంపై ఈ హెచ్చరికలు జారీ చేసినట్లు కాంగ్రెసు పార్టీ కార్యాలయం గాంధీభవన్ లో చర్చ జరుగుతోంది. అవసరమైతే డిసెంబర్ తర్వాత తాను మళ్లీ ఆమరణ నిరాహార దీక్ష చేస్తానని కెసిఆర్ హెచ్చరికలు చేశారు. ఒకవేళ కెసిఆర్ ఆమరణ నిరాహార దీక్ష చేపడితే గతంలో చేసిన తప్పులు చేయకూడదని ముఖ్యమంత్రికి సూచించినట్లు చెబుతున్నారు. కెసిఆర్ ను ముందుగానే అరెస్టు చేయకూడదని, కెసిఆర్ నిరాహార దీక్షను అనుమతించాలని మౌఖిక ఆదేశాలు ఇచ్చినట్లు సమాచారం.

కెసిఆర్ నిరాహార దీక్ష చేస్తే దాని వేడి క్రమంగా తగ్గుతుందని, ఒక వేళ అరెస్టు చేస్తే ఉద్యమం గతంలో మాదిరిగా పెద్ద యెత్తున ఎగిసిపడుతుందని అనుకుంటున్నట్లు తెలుస్తోంది. డిసెంబర్ తర్వాత సహాయ నిరాకరమ ఉద్యమం చేపడతామని కెసిఆర్ అంటున్నారు. ఈ సహాయ నిరాకరణ అన్ని ప్రభుత్వ విభాగాల్లో ప్రారంభమైతే ఏం చేయాలనే విషయంపై కూడా కాంగ్రెసు అధిష్టానం ఆలోచన చేస్తున్నట్లు చెబుతున్నారు.