రామ్ గోపాల్ వర్మ రక్త చరిత్రపై మద్దెలచెర్వు సూరి సంతృప్తి

హైదరాబాద్: రామ్ గోపాల్ వర్మ రక్త చరిత్రపై తెలుగుదేశం నాయకుడు పరిటాల రవి హత్య కేసులో నిందితుడు మద్దెలచెర్వు సూర్యనారాయణ రెడ్డి అలియాస్ సూరి సంతృప్తి వ్యక్తం చేశారు. రక్తచరిత్ర తొలి భాగంపై అభ్యంతరం లేదని ఆయన అన్నారు. ఆయన గురువారం రాత్రి దాదాపు 300 మంది అనుచరులతో కలిసి బెంగళూర్ లోని ఓ థియేటర్ లో సినిమా చూశారు. ప్రత్యేకంగా ఓ థియేటర్ ను ఏర్పాటు చేసుకుని ఆయన సినిమా చూసినట్లు తెలుస్తోంది. సినిమాలో మద్దెలచెర్వు సూరి పాత్రను సూర్య పోషించారు. సూరి భార్య భానుమతి పాత్రను ప్రియమణి పోషించారు.

సినిమాను అనంతపురంలో చూడాలని సూరి అనుకున్నారు. కానీ, ఉద్రిక్తతలు నెలకొంటాయనే ఉద్దేశంతో సినిమా చూడడానికి ఆయన బెంగళూర్ ను ఎన్నుకున్నారు. బెంగళూర్ లో అయితే ఏ విధమైన ఇబ్బంది ఉండదనేది ఆయన ఉద్దేశంగా కనిపిస్తోంది. శుక్రవారం ఉదయం ప్రేక్షకులు సినిమా విడుదల కోసం ఆసక్తిగా ఎదురు చూశారు. అనంతపురం జిల్లా ప్రజలను అవమానించే పద్ధతిలో సినిమా తీశారనే మాట కూడా వినిపిస్తోంది. సినిమా విడుదల సందర్భంగా అనంతపురంలో తీవ్ర ఉత్కంఠ నెలకొని ఉంది.